ކުޑަކުދިން ބޭނުންކޮށްގެން ކުށްކުރުވާ ފަރާތްތަކަށް ގާނޫނީ ގޮތުން ދެވޭނެ އެންމެ ހަރުކަށި އަދަބު ދިނުމަށް މަސައްކަތް ކުރައްވާނެ ކަމަށް ކޮމިޝަނާ އޮފް ޕޮލިސް (ސީޕީ) އިސްމާއީލް ނަވީން ވިދާޅުވެއްޖެ އެވެ.

ސީޕީ މިފަދައިން ވިދާޅުވީ ކުޑަކުއްޖަކު މެދުވެރިކޮށް މަސްތުވާތަކެތި އެއްތަނުން އަނެއްތަނަށް އުފުލައި، އެ ކުއްޖާ ކުށްކުރުވުމަށް ބޭނުންކޮށް އެކްސްޕްލޮއިޓް ކުރިކަމުގެ ތުހުމަތުގައި މާލެއަށް ނިސްބަތްވާ ދެ ފިރިހެނަކު ހައްޔަރުކުރި މައްސަލައާ ގުޅިގެން ކުރި ޕޯސްޓެއްގަ އެވެ. މި މައްސަލައާ ގުޅިގެން ހައްޔަރުކޮށްފައިވަނީ ހަސަން ނުއާޒާއި އަހްމަދު ނައީމް އެވެ. އެމީހުންގެ ބަންދާމެދު ގޮތެއް ނިންމުމަށް ކޯޓަށް ހާޒިރު ކުރުމުން 15 ދުވަހަށް ބަންދު ކުރުމަށް ވަނީ އަމުރުކޮށްފައެވެ.

ސީޕީ ފާހަގަކުރެއްވި ގޮތުގައި، ކުޑަކުދިންގެ ހައްގުތައް ރައްކާތެރިކޮށް، އެކުދިންނަށް އަމާން މުޖުތަމައެއް ކަށަވަރުކޮށްދިނުމަކީ ދައުލަތުގެ އެންމެ އިސް އެއް ޒިންމާ އެވެ. އެގޮތުން، މިކަމާ ގުޅޭގޮތުން ސޯޝަލް މީޑިއާގައި ކުރެއްވި ޕޯސްޓެއްގައި ކޮމިޝަނާ ވިދާޅުވީ، ކުޑަކުދިން ލައްވައި ކުށްކުރުވުމާއި، އެކުދިންގެ ނަހަމަ ފައިދާ ނަގާ ފަރާތްތަކުގެ މައްސަލަތައް ދިވެހި ފުލުހުންގެ ހިދުމަތުން ނުހަނު ސީރިއަސްކޮށް ބަލާނެ ކަމަށެވެ. އަދި އެފަދަ ފަރާތްތަކަށް ގާނޫނުގައިވާ އެންމެ ހަރުކަށި އަދަބު ކަނޑައެޅުމަށް ބާރުއަޅުއްވާނެ ކަމުގެ ޔަގީންކަން ވެސް ސީޕީ ދެއްވިއެވެ.

މީގެއިތުރުން، ކުޑަކުދިންގެ ސަލާމަތާއި ރައްކާތެރިކަމަކީ މުޅި މުޖުތަމައުގެ ބައިވެރިވުން ބޭނުންވާ އިޖުތިމާޢީ މަސްއޫލިއްޔަތެއްކަން ފާހަގަކުރައްވައި، އެންމެން ގުޅިގެން މަސައްކަތް ކުރުމަށް ސީޕީ ވަނީ އިލްތިމާސްކުރައްވާފަ އެވެ. އަދި، މިފަދަ ކަންކަން ރާވައި ހިންގާ ފަރާތްތަކާ ބެހޭ އެއްވެސް މައުލޫމާތެއް ލިބިފައިވާނަމަ، ފެމިލީ އެންޑް ޗައިލްޑް ޕްރޮޓެކްޝަންގެ ނަންބަރު 9790163 އަށް ނުވަތަ އިމަޖެންސީ ނަންބަރު 911 އަށް ގުޅުއްވައި އެ މައުލޫމާތު ހިއްސާކުރުމަށް ފުލުހުން ވަނީ އެދިފަ އެވެ.

ކުށުގެ ރެކޯޑު އޮންނަ މީހުންނާއެކު އުޅޭ 300 އެއްހާ ކުދިންގެ ލިސްޓެއް ފުލުހުން އެކުލަވާލާފައިވާއިރު، ކުށްކުރާ ކުޑަކުދިން އިތުރުވަމުންދާތީ ފުލުހުން ދަނީ އެކުދިންގެ ބެލެނިވެރިންނާ ގުޅިގެން ހާއްސަ މަސައްކަތްތަކެއް ކުރަމުންނެވެ.