ޒަކާތުގެ އެހީ ފޯރުކޮށްދިނުމުގެ ނިޒާމު އިތުރަށް ހަރުދަނާކޮށް، އެހީ ލިބޭ ފަރާތްތަކުގެ ކަރާމާތް ހިފެހެއްޓޭނެ ފަދަ ލުއިފަސޭހަ އިންތިޒާމެއް ހަމަޖެއްސުމުގެ މަގުސަދުގައި "ޒަކާތު އަސްނާފު ކާޑު" މޯލްޑިވްސް ޒަކާތު ހައުސްއިން ރަސްމީކޮށް ތައާރަފުކޮށްފި އެވެ.
އިސްލާމިކް މިނިސްޓްރީގައި ބޭއްވި ރަސްމިއްޔާތެއްގައި މި ކާޑު އިފްތިތާހުކޮށްދެއްވީ މިނިސްޓަރު ޑރ. މުހައްމަދު ޝަހީމް އަލީ ސައީދެވެ. ފަގީރުންނާއި މިސްކީނުންގެ ދަފުތަރުގައި ހިމެނޭ ފަރާތްތަކަށް އަމާޒުކޮށް ތައާރަފުކުރި މި ކާޑުގެ ސަބަބުން، ޒަކާތު ހައުސްއިން ފޯރުކޮށްދޭ އެކި ހިދުމަތްތަކާއި ކުރިއަށް އޮތް ތަނުގައި ރޭވިފައިވާ ޕްރޮގްރާމްތަކުގެ މައުލޫމާތު ފަސޭހަކަމާއެކު ހޯދޭނެ އެވެ.
މީގެއިތުރުން، އެހީއަށް އެދި ހުށަހަޅާ ކޮންމެ ފަހަރަކު އަސާސީ ލިޔެކިޔުންތައް ހުށަހަޅަންޖެހޭ އުސޫލަށް ނިމުމެއް އައިސް، ކާޑު ސްކޭންކޮށްލުމުން ވަގުތުން ހިދުމަތް ހޯދުމުގެ ފުރުސަތުވެސް މިހާރު ވަނީ ތަނަވަސްވެފަ އެވެ. އިސްލާމީ ކަންތައްތަކާ ބެހޭ ވުޒާރާއިން ހާމަކުރި ގޮތުގައި، މި އައު ނިޒާމުގެ ސަބަބުން އިދާރީ މަސައްކަތްތައް އަވަސްވެ، ހިދުމަތް ހޯދާ ފަރާތްތަކަށް ބޮޑެތި ލުއިތަކެއް ލިބިގެންދާނެ އެވެ.
މިއީ ރައީސުލްޖުމުހޫރިއްޔާ ޑރ. މުހައްމަދު މުއިއްޒުގެ ޒައާމަތުގައި ދިވެހިރާއްޖޭގެ ޒަކާތުގެ ނިޒާމު ހަރުދަނާ ކުރުމަށް ޒަކާތު ހައުސްގެ ނަމުގައި ވަކި އިދާރާއެއް އުފައްދައި، ކުރަމުންދާ މަސަައްކަތްތަކުގެ ދަށުން ކުރެވުނު މުހިއްމު ކަމަސައްކަތެއްގެ ގޮތުގައި މިނިސްޓްރީން ފާހަގަކުރެ އެވެ.
