ރައީސުލްޖުމްހޫރިއްޔާގެ ސްޕެޝަލް އެންވޯއިގެ މަގާމުގައި ހުންނެވި ކުރީގެ ރައީސް ޑރ. މުހައްމަދު ވަހީދު ހަސަން މަނިކު، އެ މަގާމުން އިސްތިއުފާ ދެއްވައިފި އެވެ.
އެމަނިކުފާނުގެ އިސްތިއުފާގެ ސިޓީ ރައީސުލްޖުމްހޫރިއްޔާގެ އޮފީހަށް ހުށަހަޅުއްވާފައިވަނީ އިއްޔެ ހެނދުނުގަ އެވެ. ރައީސް ވަހީދު މަގާމުން އިސްތިއުފާ މި ދެއްވީ، ކުޑަކުދިންނަށް ޖިންސީ ގޯނާކުރުމާއި، އެކުދިންގެ ބަރަހަނާ މަންޒަރުތައް ބޭނުންކޮށްގެން ބްލެކްމެއިލް ކުރިކަމުގެ ތުހުމަތު ކުރެވުނު ޖެފްރީ އެޕްސްޓީންއާ މުއާމަލާތް ކޮށްފައިވާ މެއިލްތަކެއް އާއްމުވެފައިވަނިކޮށެވެ.
2019 ވަނަ އަހަރު ޖަލުގައި މަރުވި އެޕްސްޓީންއާއި ރައީސް ވަހީދާ ދެމެދު އީމެއިލް މެދުވެރިކޮށް މުއާމަލާތް ކުރައްވާފައިވާކަމާއި، ދެ ބޭފުޅުން ބައްދަލުކުރެއްވިކަން އާންމުވެފައިވާ ލިޔެކިޔުންތަކުން އެނގެއެވެ.
ދުނިޔޭގެ ނުފޫޒުގަދަ އެތައް ލީޑަރުންނެއްގެ ނަން ހިމެނޭ "އެޕްސްޓީން ފައިލްސް" އާ ގުޅިގެން ޑރ. ވަހީދުގެ އޮފީހުން ނެރުނު ބަޔާނެއްގައި ބުނެފައިވަނީ، އެޕްސްޓީންއާއެކު ބޭއްވުނު ގުޅުމާމެދު ހިތާމަކުރައްވާ ކަމަށެވެ. އަދި އެއީ ހަމައެކަނި ރަސްމީ ބޭނުންތަކަށް ބޭއްވުނު ގުޅުމެއް ކަމަށާއި، އެމަނިކުފާނު ނުވަތަ އާއިލާގެ އެއްވެސް މެންބަރަކު އެޕްސްޓީންގެ ނުރަސްމީ އެއްވެސް ހަރަކާތެއްގައި ބައިވެރިވެފައި ނުވާނެ ކަމަށް އެ ބަޔާނުގައިވެ އެވެ.
