ޖާމަނީގެ ރައީސް ފްރޭންކް-ވޯލްޓާ ސްޓައިންމަޔާގެ ދައުވަތަކަށް ރައީސުލްޖުމްހޫރިއްޔާ ޑރ.މުހައްމަދު މުއިއްޒު ރަސްމީ ދަތުރުފުޅެއްގައި ޖަރުމަންވިލާތަށް ވަޑައިގަތުމަށް ނިންމަވައިފި އެވެ.
ރައީސް އޮފީހުން މައުލޫމާތު ދިން ގޮތުގައި ރައީސް މި ދަތުރަށް ފުރާވަޑައިގަންނަވާނީ މި މަހުގެ ނުވަ ވަނަ ދުވަހުން ފެށިގެން 13 ވަނަ ދުވަހުގެ ނިޔަލަށެވެ. މި ދަތުރުފުޅުގައި ޖަރުމަންވިލާތުގެ ރައީސްއާ ބައްދަލުކުރެއްވުމަށްވަނީ ހަމަޖެހިފަ އެވެ. އަދި އެ ގައުމުގެ އިސް އޮފިޝަލުންނާ ބައްދަލުކުރައްވައި ރަސްމީ މަޝްވަރާތައް ކުރިއަށްގެންދަވާނެ ކަމުގައިވެސް ރައީސް އޮފީހުން ބުންޏެވެ.
މީގެއިތުރުން، މި ދަތުރުފުޅުގެ ތެރެއިން ރައީސް ހަމްބޮލްޑް-ޔުނިވާސިޓީ ޒޫ ބާލިންއަށް ވަޑައިގަންނަވާ، މޫސުމަށް އަންނަ ބަދަލުތަކުގެ ދާއިރާއިން ރާއްޖޭގެ ތަޖުރިބާއާ ބެހޭ ގޮތުން ކީނޯޓް ހިތާބެއްވެސް ދެއްވާނެ އެވެ. އަދި ޖަރުމަނު ކައުންސިލް އޮން ފޮރިން ރިލޭޝަންސްގައި ހާރިޖީ ސިޔާސަތުގައި ކަނޑުގެ ދައުރާ މެދު ރާއްޖޭގެ ނަޒަރިއްޔާތު ފާހަގަކޮށް ކީނޯޓް ސްޕީޗް ދެއްވުމަށް ވަނީ ހަމަޖެހިފަ އެވެ.
މި ދަތުރުގައި ރައީސުގެ އަރިހުގައި ކެބިނެޓް މިނިސްޓަރުންނާއި ވިޔަފާރި މަންދޫބުން ހިމެނޭހެން މަތީ ފެންވަރުގެ ވަފުދެއް ވެސް ވަޑައިގަންނަވާނެ އެވެ. އަދި ރާއްޖޭގައި ކޯލަބަރޭޓިވް އިންވެސްޓްމަންޓްގެ ފުރުސަތުތައް ހޯދުމަށް ދެ ގައުމުގެ މަންދޫބުން ބައިވެރިވާ ބިޒްނަސް ފޯރަމެއް ވެސް ބާއްވާނެ އެވެ.
މި ދަތުރުފުޅަކީ 5 ޖުލައި 1966 ގައި ރަސްމީކޮށް މޯލްޑިވްސް އާއި ޖަރުމަނާ ދެމެދު ޑިޕްލޮމެޓިކް ގުޅުންތައް ގާއިމްކުރިތާ 60 އަހަރު ފުރުމާ ދިމާކޮށެވެ.
