ރިޔާސީ އިންތިހާބާއި ރައްޔިތުންގެ މަޖިލިސް އިންތިހާބު އެއްކޮށް ބޭއްވުމާ ގުޅޭގޮތުން ރައްޔިތުންގެ ހިޔާލު ހޯދުމަށް ނަގާ ވޯޓު، ކުރިއަށް އޮތް ކައުންސިލް އިންތިހާބާއެކު ބޭއްވުމަކީ އެންމެ ރަނގަޅު ގޮތްކަމަށް ގަބޫލުކުރައްވާކަމަށް އެޓާނީ ޖެނެރަލް އަހްމަދު އުޝާމް ވިދާޅުވެއްޖެ އެވެ.
އުޝާމް މިފަދައިން ވިދާޅުވީ ސަރުކާރުގެ ފަރާތުން ގާނޫނު އިސްލާހު ކުރުމަށް ހުށަހަޅާފައިވާ ބިލާ ގުޅޭ ގޮތުން އިލެކްޝަންސް ކޮމިޝަނާއި އެޓާނީ ޖެނެރަލްގެ އޮފީހުގެ ހިޔާލު ހޯދުމަށް މިއަދު ބޭއްވި ރައްޔިތުންގެ މަޖިލީހުގެ މިނިވަން މުއައްސަސާތަކުގެ ކޮމިޓީގައި ވާހަކަދައްކަވަމުންނެވެ. އޭނާ ވިދާޅުވީ، ރިޔާސީ އިންތިހާބާއި ރައްޔިތުންގެ މަޖިލީހުގެ އިންތިހާބު އެކުގައި ބޭއްވުމުން ރައްޔިތުންނަށް ގިނަ ފައިދާތަކެއް އެބަހުރި ކަމަށެވެ. އަދި މި ބިލަކީ ސަރުކާރުން ގިނަ މަޝްވަރާތަކެއް ކޮށްފަ ހުށަހަޅާފައިވާ ބިލެއް ކަމަށާއި، މިފަދަ ވޯޓެއް ނެގުމަށް އެއްވެސް ގާނޫނީ ހުރަހެއް ނެތް ކަމަށްވެސް އޭނާ ވަނީ ފާހަގަކުރައްވާފަ އެވެ.
މީގެއިތުރުން މީ ހަރަދުތައް ކުޑަކުރުމުގެ މުހިންމު ފިޔަވަޅެއް ކަމަށާއި، ގާނޫނުން ދޭން ޖެހޭ 45 ދުވަހުގެ މުއްދަތު ދިނުމަށްފަހު، ކުރިއަށް އޮތް ލޯކަލް ކައުންސިލް އިންތިހާބާއި އަންހެނުންގެ ތަރައްގީއަށް މަސައްކަތް ކުރާ ކޮމިޓީގެ އިންތިހާބާއެކު މި ވޯޓު ނެގުމަކީ އެންމެ ބުއްދިވެރި ގޮތް ކަމަށްވެސް އޭނާ ވިދާޅުވިި އެވެ.
"މިސާލަކަށް ލޯކަލް ކައުންސިލް އިންތިހާބު ބޭއްވޭ ދުވަސްކަމުގައި ވަނީނަމަ އެއީ ޤާނޫނާ ފުށުއަރާ ކަމެއް ނޫން. އަޅުގަނޑު ދެކޭގޮތުގައި މިފަދަ ކަމެއް ކުރާނަމަ އެންމެ ރަނގަޅުގޮތަކީ އިންތިހާބެއް ކުރިމަތީގައި އޮތްކަމުގައި ވަނީނަމަ އެ އިންތިޚާބާއެކީގައި އެކަން ކުރުން،" އުޝާމް ވިދާޅުވި އެވެ.
އިލެކްޝަންސް ކޮމިޝަނުން ބުނެފައިވާ ގޮތުން ލޯކަލް ކައުންސިލު އިންތިހާބާ އެއްކޮށް ރިފަރެންޑެމް ވޯޓު ކުރިއަށްގެންދާނަމަ މި މަހުގެ 18 ވަނަ ދުވަހުގެ ކުރިން އެ އިންތިހާބާ ގުޅޭ ގޮތުން ފުރިހަމަކުރަންޖެހޭ ހުރިހާ އިޖުރާއާތުތަކެއް ފުރިހަމަކޮށް، ފެންނަ ނުފެންނަ ވޯޓު ނެގުމާ ގުޅޭ ގަރާރު އެ ކޮމިޝަނަށް ފޮނުވަންޖެހޭނެ އެވެ.
ރިޔާސީ އިންތިހާބާއި މަޖިލިސް އިންތިހާބު އެއްކޮށްލުމަށްޓަކައި، މިހާރު ހިނގަމުންދާ 20 ވަނަ މަޖިލީހުގެ ދައުރު 1 ޑިސެމްބަރު 2028 އަށް ކުރުކުރަން ގާނޫނުއަސާސީއަށް ހުށަހެޅި އިސްލާހުގެ މަސައްކަތް މިހާރު އޮތީ ކޮމިޓީ މަރުހަލާގަ އެވެ. މި ބަދަލާ މެދު ރައްޔިތުންގެ ހިޔާލު ހޯދުމުގެ ވޯޓު އަންނަ އަހަރުގެ އޭޕްރީލް 4 ގައި ބާއްވާ ކައުންސިލް އިންތިހާބާ އެކު ކުރިއަށް ގެންދަން ސަރުކާރުން ނިންމާފައިވާއިރު، މިނިވަން މުއައްސަސާތަކުގެ ކޮމިޓީން މިހާރު ދަނީ ބަންޑާރަ ނައިބުގެ އޮފީހާއި، އިލެކްޝަންސް ކޮމިޝަން އަދި ސިޔާސީ ޕާޓީތަކާ ބައްދަލުކޮށް މަޝްވަރާ ކުރަމުންނެވެ.
