ކުރިއަށް އޮތް ރޯދަ މަހު ފައިސާއިން ފިތުރު ޒަކާތް ދެއްކުމުގެ ކަންކަން ލުއިފަސޭހަކޮށްދިނުމަށްޓަކައި، "ފިތުރު ޕޯޓަލް"ގެ ނަމުގައި ހާއްސަ ޑިޖިޓަލް ޕްލެޓްފޯމެއް މޯލްޑިވްސް ޒަކާތު ހައުސްއިން ތައާރަފުކޮށްފި އެވެ.
މި ޕޯޓަލް ތައާރަފުކުރުމުގެ މައިގަނޑު މަގްސަދަކީ، ރަށު ކައުންސިލުތަކާއި ޒަކާތު ހައުސް މެދުވެރިކޮށް ނަގުދު ފައިސާ އިން ޒަކާތް ބަލައިގަތުމުގެ ނިޒާމު މިހާރަށްވުރެ ހަރުދަނާކޮށް، އެއްގޮތް އުސޫލަކުން އެ މަސައްކަތް ކުރިއަށް ގެންދިއުން ކަމަށް ޒަކާތު ހައުސް އިން ބުންޏެވެ.
މި ޕޯޓަލް މެދުވެރިކޮށް ނަގުދު ފައިސާއިން ދައްކާ ޒަކާތުގެ މުއާމަލާތްތައް ވަގުތުން މޮނިޓާ ކުރުމުގެ ފުރުސަތު ލިބިގެންދާނެ އެވެ. މީގެ ސަބަބުން، އޮންލައިންކޮށް އަދި ނަގުދު ފައިސާއިން ލިބޭ ފިތުރު ޒަކާތުގެ ޖުމްލަ އަދަދުތައް ކޮންމެ ދުވަހަކުވެސް ކަށަވަރު ކުރެވޭނެ އެވެ.
މި ނިޒާމުގެ ސަބަބުން ހުރިހާ މައުލޫމާތެއް އެއް ގަޑިއެއްގައި ބަލައިލެވޭތީ، އިސްލާމީ ޝަރީއަތުގައި ކަނޑައަޅުއްވާފައިވާ ގޮތުގެ މަތިން ރޯދަ މަސް ނިމުމުގެ ކުރިން ލަސްނުކޮށް، ރާއްޖޭގެ އެކި ކަންކޮޅުތަކުގައި ތިބި ޒަކާތް ހައްގުވާ ފަރާތްތަކަށް އަވަސްކަމާއި ހަމަހަމަކަމާއެކު ޒަކާތް ފޯރުކޮށްދިނުމަށް މަގުފަހިވެގެންދާނެ ކަމަށްވެސް އެ އިދާރާއިން ބުންޏެވެ.
