ކ. ތިލަފުށީ ކުނިގޮނޑުން ބަންގްލަދޭޝްގެ ރައްޔިތަކު މަރުވެފައި އޮއްވާ ފެނުނު މައްސަލައިގައި، ސްރީލަންކާއަށް ނިސްބަތްވާ މީހަކު ފުލުހުންގެ ބަންދަށް ގެންގޮސްފި އެވެ.
މި ހާދިސާގައި ނިޔާވެފައިވަނީ އުމުރުން 24 އަހަރުގެ އަމީން މިއާ އެވެ. އޭނާ ގެއްލިގެން ހޯދަން ފަށާފައިވަނީ މިދިޔަ މަހުގެ 26 ވަނަ ދުވަހުން ފެށިގެން ނެވެ. އޭނާގެ ހަށިގަނޑު ފެނިފައިވަނީ ހޯދަމުންދާތާ ދެ ދުވަސް ފަހުން، މިދިޔަ މަހުގެ 28 ވަނަ ދުވަހު އެވެ.
ފުލުހުން ހާމަކުރި ގޮތުގައި، އަމީން ގެއްލުނު ސަރަހައްދުގެ ސީސީޓީވީ ފުޓޭޖްތަކުން ފެންނަ ގޮތުގައި، އެކްސްކެވޭޓަރެއްގެ ދަތްގަނޑުން އޭނާގެ ގައިގައި ޖެހުނު ނަމަވެސް، އެ މަސައްކަތް މެދުކެނޑުމެއް ނެތި ވަނީ ކުރިއަށް ގެންގޮސްފައިވެ އެވެ.
މި މައްސަލައާ ގުޅިގެން ކޯޓު އަމުރެއްގެ ދަށުން ހައްޔަރުކޮށްފައިވަނީ އެކްސްކެވޭޓަރު އޮޕަރޭޓް ކުރަން އިން އުމުރުން 32 އަހަރުގެ ލަންކާ މީހެކެވެ. ފުލުހުން ބުނީ، މި މައްސަލައިގެ ތަހުގީގަށް ލިބޭ ކުރިއެރުންތަކާ ގުޅޭގޮތުން ހާމަކުރެވެން ހުރި މައުލޫމާތުތައް ހިއްސާކުރަމުންދާނެ ކަމަށެވެ.
