މޫސުމަށް އަންނަ ބަދަލުތަކާ ގުޅިގެން ދިވެހި ރާއްޖެ ފަދަ ގައުމުތަކުގެ ތަޖުރިބާތައް ހިއްސާކުރެއްވުމަށް ރައީސުލްޖުމްހޫރިއްޔާ ޑރ. މުހައްމދު މުއިއްޒު ޖަރުމަނުގެ ހަމްބޯލްޓް ޔުނިވާސިޓީގައި ތަގުރީރުކުރައްވާ ގޮތަށް ހަމަޖެހިއްޖެ އެވެ.
"ކްލައިމެޓް ޗޭންޖް ވިތައުޓް ބޯޑާސް: ލެސަންސް ފްރޮމް ދަ މޯލްޑިވްސް އެޑެޕްޓޭޝަން އެކްސްޕީރިއަންސް" މި މައުޟޫއަށް ރައީސް މުއިއްޒު ކީނޯޓް ސްޕީޗެއް ދެއްވުމަށް ހަމަޖެހިފައިވަނީ އަންނަ މަހުގެ 11 ވަނަ ދުވަހު އެވެ.
މި ކީނޯޓްގައި، ސައިންޓިފިކް ދިރާސާތަކާއި، ހޯދުންތަކުގެ މައްޗަށް ބިނާކޮށް، މޫސުމަށް އަންނަ ބަދަލުތަކަށް ހޭނުމަށާއި، މޫސުމަށް އަންނަ ބަދަލުތަކުން އަރައިގަތުމަށް ރާއްޖެއިން ކުރަމުންދާ މަސައްކަތްތަކުގެ މައްޗަށް އެމަނިކުފާނު އަލިއަޅުވާލައްވާނެ އެވެ.
މި ތަގުރީރަށްފަހު، މޫސުމީ ބަދަލުތަކާ ގުޅޭ ސިޔާސަތުތަކުގެ މުހިއްމުކަމާއި، މި މަސައްކަތަށް ބައިނަލްއަގްވާމީ މުޖުތަމައުގެ އެއްބާރުލުމާއި މޫސުމީ ބަދަލުތަކުން އަރައިގަތުމަށް ކުރާ މަސައްކަތްކުރުމުގައި ޔުނިވާސިޓީތަކާއި ރިސާޗް އިންސްޓިޓިއުޓްތަކުގެ ދައުރާ ގުޅިގެން މަޝްވަރާ ކުރެއްވުމަށް ވެސް ވަނީ ހަމަޖެހިފަ އެވެ. މި މަޝްވަރާތައް ކުރައްވާނީ ހަމްބޯލްޓް ޔުނިވާސިޓީގެ ޕްރޮފެސަރު މާސެލް ރޮބިޝޯންއާއި، ޑޮކްޓަރ އެކްސެލް ކްލީއާ އާއެކު އެވެ.
މީގެއިތުރުން، މޫސުމީ ބަދަލުތަކަށް ހޭނި، އެކަންކަމުން އަރައިގަތުމަށް ރާއްޖެއިން ކަނޑައަޅާ ސިޔާސަތުތައް އެކަށައެޅުމުގައި ސައިންޓިފިކް ދިރާސާތަކުގެ ދައުރުގެ މައްޗަށް ވެސް މި މަޝްވަރާ ބައްދަލުވުމުގައި އަލިއަޅުވާލައްވާނެ އެވެ.
