މީހުން ދިރިއުޅޭ އަދި ޓޫރިޒަމްގެ ވަސީލަތްތަކާއި އިގުތިސާދީ އެހެން ބައެއް މަސައްކަތްތައް ވެސް ކުރާ ގޮތަށް "ސަސްޓެއިނަބުލް ޓައުންޝިޕް" އެެއް ތަރައްގީ ކުރަން ސަރުކާރުން ފުރަތަމަ ފަހަރަށް ހުއްދަ ދިން ކްރިސްޓަލް ހޯލްޑިންސް އިން ނ. އަތޮޅުގައި ގާއިމްކުރާ ޓައުންޝިޕްގެ އަމަލީ މަސައްކަތް ރަސްމީކޮށް މިއަދު ފަށައިފި އެވެ.
މި މަޝްރޫއުގެ އަމަލީ މަސައްކަތް ފައްޓަވައި ދެއްވާފައި ވަނީ ރައީސް ޑރ. މުހައްމަދު މުއިއްޒެވެ. އެމަނިކުފާނުގެ އަރިހުގައި، އިކޮނޮމިކް މިނިސްޓަރު މުހައްމަދު ސައީދާއި، ހައުސިން މިނިސްޓަރު ޑރ. އަބްދުﷲ މުއްތަލިބް ވެސް ވަނީ ބައިވެރިވެވަޑައިގެންނެވި އެވެ. މީގެއިތުރުން އެ މަޝްރޫއު ހަވާލުކޮށްފައިވާ ކްރިސްޓަލް ހޯލްޑިންގްސް ޕްރައިވެޓް ލިމިޓެޑްގެ ސީއީއޯ ޕެޓާ ކާސްޓިކާއި އެ ކުންފުނީގެ ބައެއް އިސްފަރާތްތަކުން ވެސް ވަނީ ބައިވެރިވެވަޑައިގެންފަ އެވެ.
މި ރަސްމިއްޔާތުގައި ވާހަކަފުޅު ދައްކަވަމުން، ޕްރޮޖެކްޓް އައިލާގެ ޗީފް އެގްޒެކެޓިވް އޮފިސަރު ޕީޓާ ކްރިސްޓިކް ވަނީ ރައީސުލްޖުމްހޫރިއްޔާގެ ދުރު ވިސްނުންފުޅާއި ހަރުދަނާ ލީޑަރޝިޕް ފާހަގަކުރައްވައި އެކަމަށް ތައުރީފުކުރައްވާފަ އެވެ. އަދި ސަސްޓެއިނަބަލް ޓައުންޝިޕް ކޮންސެޕްޓަކީ ރާއްޖޭގެ ތަރައްގީއަށް މުހިއްމު ވިސްނުންތެރި މޮޑެލެއްކަމަށް ވެސް ވަނީ ވިދާޅުވެފަ އެވެ.
މީގެއިތުރުން މި ރަސްމިއްޔާތުގައި އިކޮނޮމިކް މިނިސްޓަރ މުހައްމަދު ސައީދު ވެސް ވަނީ ވާހަކަދައްކަވާފަ އެވެ. އެގޮތުން މިނިސްޓަރު ވަނީީ، އިގްތިސާދު ސިންދަފާތުކުރުމަށް އެސްއީޒެޑް އޮނިގަނޑުގެ މުހިންމުކަން ފާހަގަކުރައްވާފަ އެވެ. އަދި، އައިލާ ފަދަ މަޝްރޫއުތަކުގެ ސަބަބުން ޗުއްޓީ ހޭދަކުރާ މަންޒިލެއްގެ އިތުރުން އިންވެސްޓްކޮށް ދިރިއުޅެވޭނެ އަދި ދިގުމުއްދަތަކަށް ފައިދާ އިތުރުކުރެވިދާނެ ތަނަކަށް ރާއްޖެ ހެދިދާނެ ކަމަށް ވެސް މިނިސްޓަރު ވިދާޅުވި އެވެ.
މި މަޝްރޫއު ނިންމާލުމަށް އަމާޒު ހިފާފައިވަނީ 2028 ވަނަ އަހަރުގެ ނިޔަލަށެވެ. 790 މިލިޔަން އެމެރިކާ ޑޮލަރު ނުވަތަ 12.2 ބިލިޔަން ރުފިޔާ އިންވެސްޓްކޮށްގެން ނ. އަތޮޅުގައި ތަރައްގީކުރާ ޓައުންޝިޕް ވާނީ ޒަމާނުގެ ވަސީލަތްތަކާއި ސިފަތަކާއެކު އިންޑިއާ ކަނޑުގެ އިތުރަށް ދުނިޔޭގެ ފެންވަރުގައިވެސް ފާހަގަކުރެވޭ ތަފާތު މަޝްރޫއަކަށް ސަރުކާރުން ބުނެ އެވެ.
