ގިރާވަރުފަޅުގެ ލޭންޑް ޔޫސް ޕްލޭނަށް ބަދަލުތަކެއް ގެނެސްފައިވާތީ ގޯތި ލިބުނު މީހުންގެ ބިމުގެ ސަރަހައްދުތައް ކަނޑައެޅުމަށް ގުރު ނެގުން ހޮނިހިރު ދުވަހު ބާއްވަން ނިންމައިފި އެވެ.
ހައުސިން މިނިސްޓްރީއިން މިގޮތަށް ނިންމާފައި ވަނީ ކުރީގެ ލޭންޑް ޔޫސް ޕްލޭންގައި 610 ގޯތި މަދުވާތީ، އެ އަދަދު ހިމަނައިގެން ޖުމްލަ 4072 ގޯތި ހިމެނޭހެން އައު ޕްލޭނެއް އެކުލަވާލުމާ ގުޅިގެންނެވެ. މި މަހުގެ 26 ވަނަ ދުވަހު ގެޒެޓްކޮށްފައިވާ މި ޕްލޭނުގެ ސަބަބުން "ބިންވެރިޔާ" ސްކީމްގެ ދަށުން ގިރާވަރުފަޅުން ގޯތި ލިބިފައިވާ ފަރާތްތަކަށް ކަނޑައެޅިފައިވާ ބިމުގެ ސަރަހައްދުތަކަށް ބަދަލު އަންނާނެ އެވެ.
މި ގުރުއަތުލުން ކުރިއަށްދާނީ އެދުވަހުގެ ހެނދުނު 09:30 ގައި ސޯޝަލް ސެންޓަރުގެ ހޯލުގަ އެވެ. އާ ލޭންޑް ޔޫސް ޕްލޭންގައި ވާ ގޮތުން މިހާރު ދޫކުރުމަށް ނިންމާފައިވަނީ ޖުމްލަ 4،072 ގޯއްޗެވެ.
ގިރާވަރުފަޅުން ދޫކުރާ ގޯތީގެ އަދަދާއި ބޮޑުމިނުގެ ތަފްސީލް:
- 1250 އަކަފޫޓުގެ 2603 ގޯތި
- 1650 އަކަފޫޓުގެ 1214 ގޯތި
- 2050 އަކަފޫޓުގެ 254 ގޯތި
- 2450 އަކަފޫޓުގެ 01 ގޯތި
ގޯތީގެ ވެރިފަރާތުގެ ބަދަލުގައި އެހެން މީހަކު ހާޒިރުވާނަމަ، ވެރިފަރާތުގެ އައިޑީ ކާޑު ކޮޕީއާއި ބަދަލުގައި ހާޒިރުވާ ފަރާތުގެ އައިޑީ ކާޑު ކޮޕީގެ އިތުރުން އެކަން އަންގައިދޭ ލިޔުމެއް ގެންނަން ޖެހޭނެ ކަމަށް މިނިސްޓްރީއިން ބުންޏެވެ.
ގުރުއަތުލުން ކުރިއަށްދާއިރު، ގޯތި ލިބިފައިވާ ފަރާތަށް ހަމަޖެހޭ ޕްލޮޓް "ހިޔާވެހި" ޕޯޓަލްއިން ވަގުތުން ފެންނާނެ ކަމަށާއި، އެސްއެމްއެސްގެ ޒަރިއްޔާއިން ވެސް އެ މައުލޫމާތު ހިއްސާކުރާނެ ކަމަށް ވުޒާރާއިން ބުނެއެވެ. މި ހަރަކާތް ޕީއެސްއެމް މެދުވެރިކޮށް ވަގުތުން ދެއްކުމަށް ވެސް ވަނީ ހަމަޖެހިފަ އެވެ. ގުރުއަތު ނިމުމުން ގޯތި ހަވާލުކުރުމުގެ އެއްބަސްވުމުގައި ސޮއިކުރުމާއި ރަޖިސްޓަރީ ހަވާލުކުރުމުގެ ކަންކަން ކުރިއަށްދާނެ ގޮތް ފަހުން އިއުލާން ކުރާނެ އެވެ.
