ބޭންކް އޮފް މޯލްޑިވްސް (ބީއެމްއެލް)ގެ ކްރެޑިޓް ކާޑުތަކުގެ ލިމިޓް، އަންނަ ފެބްރުއަރީ މަހުން ފެށިގެން ބޮޑުކޮށްފި އެވެ.

ބީއެމްއެލްއިން ބުނިގޮތުގައި، މި ބަދަލު ގެންނަން ނިންމާފައިވަނީ އަންނަ ފެބްރުއަރީމަހުގެ އެކަކުން ފެށިގެންނެވެ. އެގޮތުން ކްލެސިކް ކާޑުގެ ލިމިޓް 750 ޑޮލަރުން 1،400 ޑޮލަރަށް، ގޯލްޑް ކާޑުގެ ލިމިޓް 750 ޑޮލަރުން 1500 ޑޮލަރަށް، އަދި ޕްލެޓިނަމް ކާޑުގެ ލިމިޓް 1،500 ޑޮލަރުން 3،000 ޑޮލަރަށް ބޮޑުވާނެ އެވެ.

ބީއެމްއެލް އިން ބުނީ ކްރެޑިޓް ކާޑުގެ ލިމިޓް މަތި ކުރިނަަމަވެސް، ޑެބިޓް ކާޑު ބޭނުން ކުރެވޭ ގޮތަށް ބަދަލެއް ނާންނާނެ ކަމަށެވެ.

ޑެބިޓް ކާޑުން ރާއްޖޭން ބޭރުގައި ފައިސާ ދެއްކުމަށް ކަނޑައަޅާފައިވާ ލިމިޓް މިދިޔަ ނޮވެމްބަރު މަހުގެ 11 ވަނަ ދުވަހުން ފެށިގެން 1،000 ޑޮލަރަށް ވަނީ ބޮޑުކޮށްފަ އެވެ. އަދި އެއާލައިންތަކުން ޓިކެޓް ނެގުމާއި ރާއްޖޭން ބޭރުގައި ހޮޓަލަށް ޑެބިޓް ކާޑުން ފައިސާ ދެއްކޭ އަދަދު 3،000 ޑޮލަރަށް މަތިކޮށްފައިވާއިރު، ބޭސްފަރުވާއަށް ހޮސްޕިޓަލަށް ދައްކަން ޖެހޭ ފައިސާއަށް ބޭންކުގައި އެދުމުން ޑެބިޓް ކާޑުން ހޮސްޕިޓަލަށް ދެއްކޭނެ ގޮތްވެސް ވަނީ ހަމަޖައްސައިފަ އެވެ.