"ސްޕޫންފީޑް" ކޮށްގެން ދަރިވަރުންނަށް ކިޔަަވައިދިނުން ހުއްޓާލަން ޖެހޭ ކަމަށާއި އަމިއްލައަށް ކަންކަން ދަސްކޮށް، ޒިންމާނެގުމުގެ ފުރުސަތު ދަރިވަރުންނަށް ދޭންޖެހޭކަމަށް އެޑިއުކޭޝަން މިނިސްޓަރު ޑރ. އިބްރާހީމް ޝަފީއު ވިދާޅުވެއްޖެ އެވެ.
މިނިސްޓަރު މިފަދައިން ވިދާޅުވީ، ޝަހީދު އަލީ ސްކޫލު ހުޅުވުމަށްޓަކައި މިއަދު ބޭއްވި ރަސްމިއްޔާތުގައި ވާހަކަދައްކަވަމުން ނެވެ. އޭނާ ވިދާޅުވިގޮތުގައި، އަދުގެ ދަރިވަރުންނަކީ މި ގައުމުގެ މުސްތަގުބަލެވެ. އަދި އެދަރިވަރުންނަކީ ކާމިޔާބު އަދި ޒިންމާދާރު ބަޔަކަށް ހެދުމަށް އެންމެންވެސް މަސައްކަތް ކުރަންވާނެކަމަށް ވިދާޅުވި އެވެ. އެގޮތުން، ދަރިވަރުންނަށް އަބަދު ސްޕޫން ފީޑް ނުކޮށް، އަމިއްލަ އުނގެނުމަށް ޒިންމާވާ ބައެއްގެ ގޮތުގައި ބައްޓަންކުރުމަށް މިނިސްޓަރު ވަނީ ގޮވާލައްވާފަ އެވެ.
"އަބަދު ސްޕޫންފީޑް ކޮށްގެން، އަބަދު ކައިރީގައި ބައިންދައިގެން ކިޔަވައިދިނުމުގެ ވައްޓަފާޅި ބަދަލުކުރަންއެބަޖެހޭ. ފިކުރާއި ވިސްނުން ތަރައްގީވާނީ އޭރުން. ދަރިވަރުންނަށް ކިޔެވުމަށް މިނިވަންކަންދޭން އެބަޖެހޭ." މިނިސްޓަރު ވިދާޅުވި އެވެ.
މީގެއިތުރުން މިނިސްޓަރު ވަނީ، ފިކުރާއި ވިސްނުން ތަރައްގީ އަދި އަމިއްލަ ކިޔެވުމަށް ޒިންމާވާ ދަރިވަރުން މި ގޮތަށް ބިނާ ކުރުމުން އެ ދަރިވަރުންގެ މުސްތަގުބަލަށްވެސް ހެޔޮ އަސަރު ކުރާނެކަމަށް ވިދާޅުވެފަ އެވެ. އެގޮތުން، މަސަތްކަތުގެ މާހައުލުގަޔާ، އަމިއްލަ ދިރިއުޅުމުގަވެސް ޒިންމާދާރު ޖީލެއް ބިނާކޮށް އެކަމުގެ ނަތީޖާ ފެނިގެން ދާނެ ކަމަށް މިނިސްޓަރު ވަނީ ވިދާޅުވެފަ އެވެ.
2023 ވަނަ އަހަރުގެ ޑިސެމްބަރު މަހުގެ 23 ވަނަ ދުވަހު ބިންގާ އެޅި ޝަހީދް އަލީ ސްކޫލްގެ މަސައްކަތް އެއްކޮށް ނިންމާފައިމިވަނީ ދެ އަހަރެއްހާ ދުވަހުގެތެރޭގަ އެވެ. 1900 އަށްވުރެ ގިނަ ދަރިވަރުންނާއެކު މިއަދު ކިޔަވައިދޭންފެށި ޝަހީދު އަލީ ސްކޫލްގައި 230 މުދައްރިސުން ކިޔަވައިދޭނެ އެވެ.މި ސްކޫލްގައި މަލްޓިޕާޕަސް ހޯލަކާއި، ޒަމާނީ ވަސީލަތްތަކުގެ އިތުރުން ޓާފްދަނޑަކާއި އިންޑޯ ކުޅިވަރުތައް ކުޅޭވޭނެ އިންތިޒާމްތައް ވެސް ވަނީ ހަމަޖައްސާފަ އެވެ. މި ސްކޫލަކީ 1،500 ކުދިންގެ ޖާގައިގެ ސްކޫލެއް ނަމަވެސް ދެ ދަންފަޅިއަށް ކިޔަވައިދޭނަމަ 2500 ކުދިންނަށް ކިޔަވައިދެވޭނޭކަމަށް އެޑިއުކޭޝަން މިނިސްޓްރީިން ބުންޏެވެ.
ގްރޭޑް 1-10 އާ ހަމައަށް ކިޔަވައިދޭން ނިންމާފައިވާ ޝަހީދު އަލީ ސްކޫލުގައި 32 ކުދިންގެ ޖާގައިގެ 54 ކްލާސްރޫމު ހިމެނެ އެވެ. އަދި 400 ކުދިންގެ އޮޑިޓޯރިއަމަކާއި ލައިބްރަރީ އާއި ކޮމްޕިއުޓަރު ލެބާއި 3 ސައިންސް ލެބްވެސް ހިމެނޭނެ އެވެ.
