ސަރުކާރުގެ "ބޯހިޔާވަހިކަން އެންމެންނަށް" ސިޔާސަތުގެ ދަށުން، ދޫކުރާ ބިމާ ފްލެޓް ދިނުމުގެ އުސޫލުގައި ބޯހިޔާވެހިކަން ނެތް ފަރާތްތަކަށް އިސްކަން ދިނުމުގެ ސަބަބުތަށް ހައުސިން މިނިސްޓަރު އަބްދުﷲ މުއްތަލިބް ހާމަކުރައްވައިފި އެވެ.
މިނިސްޓަރު މިކަންތަށް ހާމަކޮށްފައި ވަނީ އޭނާގެ އަމިއްލަ ލިންކްޑްއިން އެކުންޓްގައި އާންމު ކުރެއްވި ބަޔާނެއްގައި އެވެ.
މިނިސްޓަރު ވިދާޅުވީ، ބޯހިޔާވަހިކަމަކީ އަސާސީ ހައްގެއް ކަމަށާއި އެއީ މުދާ ގިނަކުރަން ލިބޭ ފުރުސަތެއް ނޫން ކަމަށެވެ. އެހެންވެ ސަރުކާރުން ބޯހިޔާވަހިކަމަށް ހުޅުވާލާއިރު އިސްކަން ދެނީ ބޯހިޔާވެހިކަން ނެތް ފަރާތްތަކަށް ކަމަށާއި، އެއީ ގެދޮރުގެ ދަތިކަން ހައްލުކުރުމަށް ކަމަށް ވެސް މިނިސްޓަރ ވިދާޅުވި އެވެ.
މިނިސްޓަރ ވިދާޅުވީ ބޯހިޔާވަހިކަމަކީ ބަޔަކަށް މުދާ އިތުރުކޮށް، އިތުރު މަންފާތަކެއް ހޯދުމުގެ ފުރުސަތުތަކަށް ވުމަށް ވުރެ ބޮޑަށް، އެއީ ދުޅަހެޔޮ ސިއްހަތަކާއި، ރަނގަޅު ތައުލީމާއި، ވަޒީފާގެ ފުރުސަތުތަކަށް އޮތް ފެށުމެއް ކަމަށެވެ. އަދި އެއީ އުފާވެރި ހަމަޖެހޭ ދިރިއުޅުމެއްގެ ބިންގާ ކަމަށް ވެސް ވިދާޅުވި އެވެ.
މިނިސްޓަރ ވަނީ އެއްވެސް ގެދޮރެއް ނުވަތަ ބިމެއް ނެތް އާއިލާއެއްގެ ނާޒުކުކަން އިންތިހާއަށް ބޮޑުއިރު ދައުލަތުގެ ސިޔާސަތުތައް ބައްޓަންކުރަން ވާނީ މި ތަފާތުތަކަށް ރިއާޔަތްކޮށްގެންކަމަށް ވިދާޅުވެފަ އެވެ. އެހެންވެ މިގޮތަށް ކުރާ ކޮންމެ ކަމެއްގެ އަމާޒަކީ ގެދޮރުވެރިކަން ފޯރުކޮށްދެވޭ މިންވަރު އިތުރުކޮށް، ބޯހިޔާވަހިކަމަަށް އޮތް ޑިމާންޑު ކުޑަކޮށް، ކޮންމެ އާއިލާއަކަށް އެެއް ގެދޮރު ނުވަތަ ބިން ކަށަވަރުކުރެވުމުން މިހާރު އޮތް ސިޔާސަތަށް ބަދަލުތައް ގެނެސް، ޝަރުތުތައް މިހާރަށްވުރެ ލުއިކޮށް، އިތުރު ފުރުސަތުތައް ފަހިކުރެވިގެންދާނެ ކަމުގައި މިނިސްޓަރު ވަނީ ވިދާޅުވެފަ އެވެ.
