ދަރިވަރުންތަކަކަށް ޖިންސީ ގޯނާ ކުރިކަމަށް ތުހުމަތުކުރެވޭ ޓީޗަރެއްގެ މައްޗަށް 5 ދައުވާއެއް ކުރުމަށް ޕްރޮސެކިއުޓާ ޖެނެރަލްގެ (ޕީޖީ) އޮފީހުން މ. ކޮޅުފުށީ މެޖިސްޓްރޭޓް ކޯޓަށް ހުށަހަޅައިފި އެވެ.
މި މައްސަލައިގައި ދައުވާކޮށްފައި ވަނީ، މ. ކޮޅުފުށި ސާދާގެ، ޝުއައިބު އަބްދުﷲ ގެ މައްޗަށެވެ. އޭނާގެ މައްޗަށް ދައުވާ ކުރަން ނިންމާފައި ވަނީ މ. އަތޮޅު މަދަރުސާގެ ހެލްތް އެންޑް ފިޒިކަލް އެޑިއުކޭޝަން ޓީޗަރެއްގެ ގޮތުގައި ހުރެ ކިޔަވައިދިން ދެ ކުއްޖެއްގެ ގައިގަ ޖިންސީ ނިޔަތެއް އޮވެގެން އަތްލައި، އެ ކުދިންނަށް އޮރިޔާން މަންޒަރު ހިމެނޭ ވީޑިއޯ ދައްކާފައިވާ ކަމަށް ބުނާ މައްސަލައިގަ އެވެ.
ޝުއައިބުގެ މައްޗަށް ކޯޓަށް ހުށަހެޅި ދައުވާތަކުގެ ތެރޭގައި ހިމެނެނީ:
- އިތުބާރުކުރެވޭ މަގާމެއްގައި ހުރެ ކުޑަކުއްޖަކާމެދު ޖިންސީ އަމަލެއް ހިންގުމުގެ ދެ ދައުވާ
- އިތުބާރުކުރެވޭ މަގާމެއްގައި ހުރެ ކުޑަކުއްޖަކު ލައްވައި ޖިންސީ އަމަލެއް ބެލުވުމުގެ ދެ ދައުވާ
- ދިވެހިރާއްޖޭގައި އޮރިޔާން ކާޑު ގެންގުޅުމުގެ ދައުވާ
ޕީޖީ އޮފީހުން ބުނިގޮތުގަ މި ދައުވާތައް ސާބިތުވެއްޖެނަމަ، ޝުއައިބުގެ މައްޗަށް މަދުވެގެން 60 އަހަރާއި 1 މަހާއި 6 ދުވަހުގެ ޖަލު އަދަބެއް ކަނޑައެޅޭނެ އެވެ.
