ސަރުކާރުގެ "ބޯހިޔާވަހިކަން އެންމެންނަށް" ސިޔާސަތުގެ ދަށުން، ފްލެޓާއި ގޯއްޗަށް ކުރިމަތިލުމަށް ހުޅުވާލި ފުރުސަތުގައި މިހާތަނަށް 1616 އެޕްލިކޭޝަނެއް ހުށަހަޅާފައިވާކަމަށް ހައުސިން މިނިސްޓްރީން ބުނެފި އެވެ.

އޮންލައިން ޕޯޓަލް މެދުވެރިކޮށް ބިމާއި ފުލެޓަށް އެޕްލައި ކުރަން ހުޅުވާލާފައި ވަނީ ޖެނުއަރީ 19 ވަނަ ދުވަހުގެ ހެނދުނު 9:00 އަކުން ފެށިގެންނެވެ. ހައުސިން މިނިސްޓްރީން ބުނިގޮތުގައި މިހާތަނަށް މާލެ ސަރަހައްދުން ފްލެޓާއި ގޯތި ހޯދުމަށް ޖުމްލަ 1616 އެޕްލިކޭޝަން ހުށަހަޅާފައިވެ އެވެ.

އޭގެތެރޭގައި ހިމެނެނީ 1160 ފްލެޓް އެޕްލިކޭޝަނާއި 456 ބިން އެޕްލިކޭޝަނެވެ. އަދި ޑްރާފްޓް ކުރުމުގެ މަރުހަލާގައި 7605 އެޕްލިކޭޝަން ފުރިހަމަ ކުރުމުގެ މަސައްކަތް ފަށާފައިވާ ކަމަށްވެސް މިނިސްޓްރީން ބުންޏެވެ.

ފްލެޓަށް އެދި ކުރިމަތިލުމުގެ ފުރުސަތު އޭޕްރީލް 17 ވަނަ ދުވަހުގެ ރޭގަނޑު 11:59 އާ ހަމައަށް ވަނީ ހުޅުވާލާފަ އެވެ. އަދި ގޯއްޗަށް އެދި ހުށަހެޅުމުގެ ސުންގަޑިއަކީ މާޗު 4 ވަނަ ދުވަހުގެ ރޭގަނޑު 11:59 އެވެ. އެޕްލިކޭޝަން ހުށަހަޅަން ޖެހެނީ "ބޯހިޔާވަހިކަން ޕޯޓަލް" އަށެވެ.

ބޯހިޔާވަހިކަމުގެ މި ޕްރޮގްރާމްގެ ދަށުން 7,900 ފްލެޓް ދޫކުރާނެ އެވެ. އެގޮތުން، މާލޭގެ ރަށްވެހިންނަށް 4,000 ފްލެޓް، 18 އަހަރުން ދަށުގެ ކުދިން ބަލާ އެކަނިވެރި މައިންނާއި އެކަނިވެރި ބަފައިންނަށް 100 ފްލެޓް އަދި ނުކުޅެދުންތެރިކަން ހުންނަ ފަރާތްތަކަށް ވަނީ 100 ފްލެޓް ކަނޑައަޅާފަ އެވެ. އަދި، ޒުވާނުންނަށް 250 ފްލެޓް ކަނޑައަޅާފައިވާއިރު މާލޭގައި އާއިލާ ބިނާކޮށްފައިވާ ޖުޑީޝިއަރީގެ މުވައްޒަފުންނަށް 100 ފްލެޓް އަދި ފުލުުހުންނާއި ސިފައިން އަދި ކަރެކްޝަންގެ މުވައްޒިފުންނަށް ހާއްސަކޮށް ކޮންމެ މުއައްސަސާއަކަށް 100 ފްލެޓް ވަނީ ކަނޑައަޅާފަ އެވެ.

މި އުސޫލުގެ ދަށުން މާލޭގެ ރަށްވެހިންނަށް ގޯތި ދޫކުރާނީ ގްރޭޓާ މާލެ ސަރަޙައްދާއި ރަސްމާލެއިންނެވެ. އަދި، މާލޭގައި ދިރިއުޅޭ އެހެން ރަށްރަށުގެ ރަށްވެހިންނަށް ގޯތި ދޫކުރުމަށް ހަމަޖެހިފައިވަނީ ހަމައެކަނި ރަސްމާލެއިންނެވެ. ހުރިހާ ގޯއްޗެއްގެ ވެސް ބޮޑުމިނުގެ ގޮތުގައި ކަނޑައަޅާފައިވަނީ 1250 އަކަފޫޓެވެ.