މި އަހަރުގެ ރޯދަ މަހު މާލެ ސަރަހައްދުގައި ދިވެހި 37 ހާފިޒުން އިމާމުވެ ހިފްޒުކޮށް ތަރާވީސް ކުރާނެ ކަމަށް އިސްލާމިކް މިނިސްޓަރު ޑރ. މުހައްމަދު ޝަހީމް އަލީ ސައީދު ވިދާޅުވެއްޖެ އެވެ.
މިނިސްޓަރު ބުނީ، މި ހާފިޒުންގެ ތެރޭގައި ގިނައީ ރީތިކޮށް ގުރުއާން ކިޔަވާ ޒުވާން ހާފިޒުން ކަމަށެވެ. އަދި މިފަހަރުގެ ރޯދަމަހު އިސްލާމީ މަރުކަޒާއި ސަލްމާން މިސްކިތުގައި ހުކުރު ހުތުބާ ކިޔުމުގެ ފުރުސަތުވެސް ފާހަގަކޮށްލެވޭ ޒުވާން ހަތީބުންނަށް ދެއްވާނެ ކަމަށް މިނިސްޓަރު ވިދާޅުވި އެވެ. މީގެއިތުރުން، މި ދެ މިސްކިތުގައި ތަރާވީސް ނަމާދު އިމާމުވެ ކުރާނީ ދިވެހި ހާފިޒުންކަމަށް ވެސް ބުންޏެވެ.
މިސްކިތްތަކުގައި ނަމާދު ކުރާނެ ގޮތަށް އައިސްފައިވާ ބަދަލުތަކަށް އަލިއަޅުއްވާލައްވަމުން މިނިސްޓަރު ވިދާޅުވީ، އާންމުކޮށް ކުރުކޮށް ތަރާވީސްކުރާ މަޖީދީމަގު ސުލްތާން އާދިލް މިސްކިތުގައި މިފަހަރު ކުރިއަށްދާނީ ހިފްޒުކޮށް ދިގުކޮށް ކިޔަވާ ތަރާވީސް ނަމާދު ކަމަށެވެ. އަދި ބަރުބަރީ މިސްކިތުގައި ތަރާވީސް ކުރާނީ ކުރުކޮށް ކަމަށް ވިދާޅުވި އެވެ.
ސަރުކާރުގެ މުހިންމު އަމާޒަކީ 2027 ވަނަ އަހަރާ ހަމައަށްދާއިރު، މާލެ ސަރަހައްދުގެ ހުރިހާ މިސްކިތެއްގައި ތަރާވީސް ނަމާދު ކުރާ ހާފިޒުންނަކީ ދިވެހިން ކަމުގައި ހެދުން ކަމަށް މިނިސްޓަރު ވިދާޅުވި އެވެ. އަދި މާލޭގެ އިތުރުން ރާއްޖޭގެ އެކި ރަށްރަށުގައިވެސް ގިނަ އަދަދެއްގެ ދިވެހި ހާފިޒުން މިފަހަރު އިމާމުވެ ތަރާވީސް ކުރާނެކަން ވެސް މިނިސްޓަރު ވިދާޅުވި އެވެ. މީގެއިތުރުން، މިއަހަރުގެ އީދު ނަމާދުގެ ބޮޑު ޖަމާއަތްތަކުގައިވެސް ޒުވާން ހަތީބުން އިމާމުވެ ނަމާދު ކުރާނެ އެވެ.
