ރައްޔިތުންގެ ހިދުމަތުގައި 24 ގަޑިއިރު ތައްޔާރަށް ހުންނަވާނެ ކަމަށް ލޯކަލް ކައުންސިލް އިންތިހާބުގައި ޕީއެންސީގެ ފަރާތުން މާލޭ މޭޔަރު ކަމަށް ވާދަކުރައްވާ މޫސާ އަލީ ޖަލީލު ވިދާޅުވެއްޖެ އެވެ.

މޫސާ އަލީ ޖަލީލް މިފަދައިން ވިދާޅުވީ، އޭނާގެ ކެމްޕެއިން ޖަގަހަ ހުޅުވުމަށް ރޭ ބޭއްވި ރަސްމިއްޔާތުގައި ވާހަކަދައްކަވަމުން ނެވެ. އޭނާ ވިދާޅުވީ، މާލޭގެ މޭޔަރުކަމަށް ވާދަކުރައްވަނީ، އެ މަގާމުގައި ކުރިން ހުންނެވި ރައީސް ޑރ. މުހައްމަދު މުއިއްޒު ކުރެއްވި މަސައްކަތާއި، ގެންނެވި ބަދަލުތައް އަލުން ގެނެސް އެމަނިކުފާނުގެ މަސައްކަތް މިސާލެއްގެ ގޮތުގައި ބަލައިގެން ކަމަށެވެ. އެގޮތުން، މިހާތަނަށް ހަވާލުވި ކޮންމެ މަސްއޫލިއްޔަތެއްގައި ވެސް އިސްކުރެއްވީ ގައުމުގެ މަސްލަހަތާއި ރައްޔިތުންނަށް ލާބަ އާއި މަންފާ ލިބޭ މަގު ކަމަށާއި މާލޭ ސިޓީގެ މޭޔަރަކަށް ވެސް ނުކުންނަނީ އެ ރޫހުގައި، އަދި އެ އަޒުމުގައި ކަމަށް އޭނާ ވިދާޅުވި އެވެ.

މީގެއިތުރުން، މޭޔަރު ކަމަށް ހޮވުމުން އޭނާ 24 ގަޑިއިރު ހުންނާނީ، ރައްޔިތުންގެ ހިދުމަތުގައި ތައްޔާރަށް ކަމަށާއި މާލެއަށް މާ ޗާލު އުފާވެރި ދިރިއުޅުމެއް ހޯދައިދޭން އޭނާ އަބަދުވެސް މަސައްކަތް ކުރައްވާނެ ކަމަށް ވިދާޅުވި އެވެ. އަދި ތާއީދު ކުރާ ކުލައަށް ބަލައި އެއްވެސް ތަފާތުކުރުމެއް ނުގެންގުޅުއްވާނެކަމަށް ވިދާޅުވި އެވެ.

"ތިޔަ ރައްޔިތުންގެ ހިދުމަތުގައި އަޅުގަނޑު ހުންނާނީ 24 ގަޑިއިރު ތައްޔާރަށް. ގައުމީ ހިދުމަތް، ރޭދުވާ ހޭދަކޮށްގެން ދޭނީ ރައްޔިތުންގެ މުހުތާދުތައް ފުއްދައިދިނުމާއި މާލޭ ސިޓީއަށް މާ ޗާލު، މާ އުފާވެރި، މާ ހިތްގައިމު، އާ ޒަމާނެއް ހޯދައިދިނުމަށް،" މޫސާ އަލީ ޖަލީލު ވިދާޅުވި އެވެ.

މޫސާ އަލީ ޖަލީލް ވިދާޅުވީ ރައްޔިތުން މާލެއަށް ވަރަށް ބޮޑެތި ބަދަލުތައް ބޭނުންވާ ކަމަށެވެ. އަދި ރައީސް މުއިއްޒު މާލޭގެ ރައްޔިތުންނާއި އެކު ބޭއްވެވި ބައްދަލުވުންތަކުން ވަރަށް ގިނަ ޝަކުވާތައް އަޑުއިވިގެން ދިޔަ ކަމަށާއި، އެހެންކަމުން ރައްޔިތުންނަށް ހިދުމަތް ކުރުމަށް ބޭނުންވީކަމަށް އޭނާ ވިދާޅުވި އެވެ.

އަންނަ އޭޕްރިލް 4 ގައި ބާއްވާ ކައުންސިލް އިންތިހާބުގައި މާލޭގެ މޭޔަރުކަމަށް ވާދަކުރައްވާ މޫސާ އަލީ ޖަލީލްގެ ކެމްޕެއިން އޮފީސް ހުޅުވާފައި ވަނީ އާޓިފިޝަލް ބީޗް ކުރިމަތީ ހުންނަ ޕާޓީގެ އޮފީހުގަ އެވެ.