ސަރުކާރު ފަށަން ނިންމާފައިވާ ޓެކްސީ ލައިނަށް ޑްރައިވަރުން ހޯދަން މޯލްޑިވްސް ޓްރާންސްޕޯޓް އެންޑް ކޮންޓްރެކްޓިން ކޮމްޕެނީ (އެމްޓީސީސީ) އިން ބޭއްވި ވޯކް އިން އިންޓަވިއު އަށް ގިނަ ބައެއްގެ ތަރުހީބު ލިބިއްޖެ އެވެ.
ސަރުކާރުގެ ޓެކްސީ ލައިންގައި ޕާޓްޓައިމްކޮށް ޑްރައިވަރުކަން ކުރަން ބޭނުން މީހުންނަށް އެ ފުރުސަތު ހުޅުވާލައި، އެމްޓީސީސީން ވަނީ މިއަދު ހެނދުނު 10:00އިން ހަވީރު 6:00 އާ ހަމަޔަށް ވޯކް އިން އިންޓަވިއު ކުރިއަށް ގެންގޮސްފަ އެވެ. މާފަންނު ބަސް ޓާމިނަލްގައި ކުރިއަށްދިޔަ އިންޓަވިއު އަށް އެމި އުމުރުފުރާގެ މީހުން ވަނީ ގޮސްފަ އެވެ.
އެމްޓީސީސީން ޓެކްސީ ލައިންގެ ހިދުމަތަށް ނަގާނީ 407 ޑްރައިވަރުންނެވެ. އޭގެތެރެއިން 122 ޑްރައިވަރުން ހަމަޖައްސާނީ ފުލްޓައިމްކޮށެވެ. އަދި މުއަޒަފުން ނަގާއިރު އިސްކަންދެވޭނީ ޓްރާންސްޕޯޓް މިނިސްޓްރީގެ ޓެކްސީ ޑްރައިވަރުންގެ ދަފްތަރުގައި ރަޖިސްޓްރީކޮށްފައިވާ ޑްރައިވަރުންނަށް ކަމަށް އެމްޓީސީސީން ބުންޏެވެ.
ޓެކްސީ ލައިންގެ ހިދުމަތް ދިނުމަށް ހަވާލުކޮށްފައިވަނީ އެމްޓީސީސީއާ އެވެ. އެ މަޝްރޫއުގެ ފުރަތަމަ ފިޔަވަހީގައި 80 މިލިއަން ރުފިޔާ ހަރަދުކޮށްގެން 100 ކާރު ގެންނާނެ ކަމަށް އެ ކުންފުނިން ވަނީ ބުނެފަ އެވެ. މި ހިދުމަތް ފަށަން ނިންމާފައި ވަނީ އަންނަ ފެބްރުއަރީ މަހުގަ އެވެ
