ސަރުކާރުގެ "ބޯހިޔާވަހިކަން އެންމެންނަށް" ސިޔާސަތުގެ ދަށުން، "އާއިލީ ބޯހިޔާވަހިކަން" ޕްރޮގްރާމްގެ އުސޫލުތަކާ އެއްގޮތަށް ބިމާއި ފުލެޓަށް ހުޅުވާލުން ފަސްކޮށްފި އެވެ.
ހައުސިންގ މިިނިސްޓްރީން ފްލެޓާއި ގޯއްޗަށް އެދި ހުށަހެޅުމުގެ ފުރުސަތު ހުޅުވާލަން ފުރަތަމަ ކަނޑައެޅީ މިއަދު އެވެ. އެކަމަކު އެ މިނިސްޓްރީން ވަނީ އެ ތާރީޚު ފަސްކޮށްފަ އެވެ.
މިނިސްޓްރީން ބުނިގޮތުގައި މި ބަދަލު ގެނައީ ކުރިއަށް ހަފްތާ ބަންދެއް އޮތުމުންނެވެ. އެގޮތުން މި ބަދަލަކީ ހުޅުވާލާއިރު އާންމުންނަށް ގިނަ މައުލޫމާތުތަކެއް ދޭން ހުންނާނެ ކަމަށް ލަފާކޮށް، އެކަމުގައި ދަތިތައް ދިމާވެދާނެ ކަމަށް ބަލައި ގެނެވުނު ބަދަލެކެވެ. މި ގެނެވުނު ބަދަލާއި އެކު ކުރިމަތިލުމަށް ހުޅުވާލާނީ ހަފްތާ ބަންދަށް ފަހު މި މަހުގެ 18 ވަނަ ދުވަހު އެވެ.
ބޯހިޔާވަހިކަމުގެ މި ޕްރޮގްރާމްގެ ދަށުން ދޫކުރާނީ 7,900 ފްލެޓް ދޫކުރާނެ އެވެ. އެގޮތުން، މާލޭގެ ރަށްވެހިންނަށް 4,000 ފްލެޓް، 18 އަހަރުން ދަށުގެ ކުދިން ބަލާ އެކަނިވެރި މައިންނާއި އެކަނިވެރި ބަފައިންނަށް 100 ފްލެޓް އަދި ނުކުޅެދުންތެރިކަން ހުންނަ ފަރާތްތަކަށް ވަނީ 100 ފްލެޓް ކަނޑައަޅާފަ އެވެ. އަދި، ޒުވާނުންނަށް 250 ފްލެޓް ކަނޑައަޅާފައިވާއިރު މާލޭގައި އާއިލާ ބިނާކޮށްފައިވާ ޖުޑީޝިއަރީގެ މުވައްޒަފުންނަށް 100 ފްލެޓް އަދި ފުލުުހުންނާއި ސިފައިން އަދި ކަރެކްޝަންގެ މުވައްޒިފުންނަށް ހާއްސަކޮށް ކޮންމެ މުއައްސަސާއަކަށް 100 ފްލެޓް ވަނީ ކަނޑައަޅާފަ އެވެ.
ސަރުކާރުން ކުރިއަށްގެންދާ ބޯހިޔާވަހިކަން އެންމެންނަށް އަދި އާއިލީ ބޯހިޔާވަހިކަމުގެ ސިޔާސަތުގެ ދަށުން މާލޭގައި ދިރިއުޅޭ ރައްޔިތުންނަށް ބިން ދޫކުރުމާއި، މާލޭގައި ދިރިއުޅޭ ރައްޔިތުންނަށް ފްލެޓް ދޫކުރުމުގެ އާ އުސޫލު އިއްޔެ ވަނީ އާންމު ކޮށްފަ އެވެ. މި އުސޫލުގެ ދަށުން މާލޭގެ ރަށްވެހިންނަށް ގޯތި ދޫކުރާނީ ގްރޭޓާ މާލެ ސަރަޙައްދާއި ރަސްމާލެއިންނެވެ. އަދި، މާލޭގައި ދިރިއުޅޭ އެހެން ރަށްރަށުގެ ރަށްވެހިންނަށް ގޯތި ދޫކުރުމަށް ހަމަޖެހިފައިވަނީ ހަމައެކަނި ރަސްމާލެއިންނެވެ. ހުރިހާ ގޯއްޗެއްގެ ވެސް ބޮޑުމިނުގެ ގޮތުގައި ކަނޑައަޅާފައިވަނީ 1250 އަކަފޫޓެވެ.
މި އުސޫލު ބަދަލުކޮށްފައި ވަނީ، ރައީސް މާލޭގެ ރައްޔިތުންނާ އެކު ބޭއްވި ސިލްސިލާ ބައްދަލްވުންތަކުގައި ގިނަ ބަޔަކު ކުރިން ކަނޑައަޅާފައިވާ އުސޫލާ މެދު ކަންބޮޑުވުން ފާޅުކޮށްފައި ވުމުންނެވެ. އެކަށީގެންވާ ބޯހިޔާވަހިކަން ނެތް މީހުންނަށް، ބޯހިޔާވަހިކަން ފަހިކޮށްދިނުމަކީ މި ސަރުކާރުގެ އެންމެ މުހިއްމު އެއް ސިޔާސަތެވެ.
