ބޮޑުތަކުރުފާނު މަގު މަގުގެ ދެވަނަ ސެގްމަންޓްގެ ޝީޓް ޕައިލިން އެޅުމުގެ މަސައްކަތް ނިމިއްޖެ އެވެ.
އެމްޓީސީސީއިން ބުނި ގޮތުގައި، ބޮޑުތަކުރުފާނު މަގު ތަރައްގީ ކުރުމުގެ މަޝްރޫއުގެ ދެވަނަ ފިޔަވަހީގެ ދަށުން، އެ މަގުގައި 85 މީޓަރުގެ ޝީޓް ޕައިލިން އެޅުމުގެ މަސައްކަތް މިހާރު ވަނީ އެއްކޮށް ނިންމާފަ އެވެ. އެއާއެކު، ބިން ހިއްކުމުގެ މަސައްކަތް ކުރިޔަށް ގެންގޮސް، ފެނާއި ވޭސްޓް ވޯޓާ ނެޓްވޯކް އަޕްގްރޭޑް ކުރުމުގެ މަސައްކަތް އަންނަ ހަފްތާގެ ނިޔަލަށް ނިމޭނެކަމަސް އެމްޓީސީސީއިން ބުންޏެވެ.
މީގެއިތުރުން، ސައިޑްވޯކް ހެދުމާއި، ސްޓޯމް ވޯޓާ ކެޗް ޕިޓް ހަރުކުރުމާއި، ކޭބަލް ޖަންކްޝަން އިންސްޓޯލްމަންޓްވެސް ގާއިމް ކުރާނެ އެވެ. އަދި މި މަސައްކަތްވެސް އަންނަ ހަފްތާގެ ނިޔަލަށް ނިމޭނެ ކަމަށް އެމްޓީސީސީން ބުންޏެވެ.
ބޮޑުތަކުރުފާނު މަގުގެ ދެވަނަ ފިޔަވަހީގެ ދަށުން ތަރައްގީކުރަން ނިންމާފައި ވަނީ ލޯކަލް މާރުކޭޓުން ފެށިގެން ނޯތް ހާބަރާ ހަމައަށެވެ. މި ސަރަހައްދުގެ މަސައްކަތް އަންނަ އަހަރުގެ ރޯދަ މަހުގެ ކުރިން ނިންމުމަށް މަސަތްކަތްކުރަމުންދާކަމަށް ކަމަށް އެމްޓީސީސީއިން ވަނީ ބުނެފަ އެވެ.
