އިސްލާމްދީނާ ޚިލާފު ކަންކަމަށް ހިތްވަރުދީ، އެކަންކަމަށް ގޮވާލާ ސިޔާސީ ފިކުރުތަކަށް ރާއްޖޭގައި ފުރުސަތު ދެވިގެން ނުވާނެ ރައީސުލްޖުމްހޫރިއްޔާ ޑރ. މުހައްމަދު މުއިއްޒު ވިދާޅުވެއްޖެ އެވެ.
އެމަނިކުފާނު މިފަދައިން ވިދާޅުވީ ވެރިކަންކުރާ ޕީއެންސީގެ މައި ހަރުގެ ތަރައްގީކުރުމަށްފަހު ހުޅުވުމަށް ބޭއްވި ރަސްމިއްޔާތުގައި ވާހަކަދައްކަވަމުން ނެވެ.
އިސްލާމްދީނާ އިދިކީލަ ފިކުރުތަކަށް ޖާގަ ދެވިގެންނުވާނެ ކަމަށް ރައީސް ވިދާޅުވީ، ޖުވާކުޅުމާއި ޖުވާކުޅޭ ތަންތަން ހިންގުމަކީ ޖިނާއީ ކުށަކަށް ހެދުމަށްޓަކައި މިދިޔަ ހަފްތާގައި ރައްޔިތުންގެ މަޖިލީހަށް ސަރުކާރުގެ ފަރާތުން ހުށަހެޅި ބިލަށް އިދިކޮޅު ބައެއް އިދިކޮޅު ފަރާތްތަކުގެ ހިތްހަމަނުޖެހުން ފާޅުކުރަމުންދާތީ އެކަމަށް ފާޑުވިދާޅުވަމުން ނެވެ.
"އަޅުގަނޑުމެންގެ ގައުމުގައި ދީނާ ހިލާފު ކަންކަމަށް ހިތްވަރުދީ އެކަންކަމަށް ގޮވާލައި ސިޔާސީ ފިކުރުގެ ކަންކަމަކީ މި މާތްވެގެންވާ އިސްލާމްދީންދެކެ ލޯބިވާ ސައްތައިން ސައްތަ މުޖުތަމައެއްގައި ފުރުސަތު ދެވިގެންވާނެ ކަމެއް ނޫން. އެފަދަ ފިކުރުތަކުގައި މަސައްކަތް ކުރާނެ ފަރާތްތައް އަޅުގަނޑުމެންގެ އިންތިހާބުތަކުގައި ކައުންސިލް އިންތިހާބު ކަމުގައި ވިޔަސް. ފުރުސަތު ލިބިގެން ދިއުމަކީ އަޅުގަނޑުމެން އަމިއްލައަށް ކުރާ ގޯސްކަމަކަށްވާނީ" ރައީސް ވިދާޅުވި އެވެ.
އެކަން ފާހަގަކުރައްވަމުން ރައީސް ވިދާޅުވީ ގައުމު އިސްލާހު ކުރެވޭނީ ރަނގަޅު މަގުން ގެންދިއުމަށް ފިކުރު އިސްލާހުކޮށްގެން ކަމަށެވެ.
އެފަދަ ދެވަނަ މިސާލަކަށް ރައީސް ނެންގެވީ، ފަތުރުވެރިންނަށް ސަފާރީތަކުން ރަލުގެ ވިޔަފާރި މީހުން ދިރިއުޅޭ ރަށްރަށާ 1 ކިލޯ މީޓަރު ކުރެވޭ ގޮތަށް އޮތް ގަވާއިދަށް ގެންނަ އިސްލާހު ރަނގަޅަށް ތަންފީޒު ނުކުރެވުމެވެ. އެގޮތަށް ގަވާއިދަށް ބަދަލު ގެނެވުނު ނަމަވެސް އެކަން ތަންފީޒުކުރަން ޖެހޭ މީހުން ދީނާ އިދިކީލަ ވިސްނުމެއް ގެންގުޅޭނަމަ، އެކަން ރަނގަޅަށް ނުކުރާނެ ކަމަށް ރައީސް ވިދާޅުވި އެވެ.
މި ބައްދަލުވުމުގައި އެމަނިކުފާނު ވަނީ ސަރުކާރުގެ ސިޔާސަތުތަކަށް އެއްބާރުލުންދޭނެ ކެންޑިޑޭޓުން ކުރިއަށް އޮތް ލޯކަލް ކައުންސިލްތަކުގެ އިންތިހާބުން ހޮވައިދިނުމަށް އެދިވަޑައިގެންފަ އެވެ.
