ފުޓްބޯލް އެސޯސިއޭޝަން މޯލްޑިވްސް (އެފްއޭއެމް)ގެ ފައިސާއިން އެެ އެސޯސިއޭޝަންގެ ކުރީގެ ރައީސް ބައްސާމްް އަދީލް ޖަލީން އަމިން އެވެނިއުއިން ޕެންޓްހައުސްއެއް ގަތް މައްސަލާގައި އަމީން ކޮންސްޓްރަކްޝަން ގެ މައްޗަށް ކުރި ދައުވާ ސާބިތުނުވާ ކަމަށް ކުރި ހުކުމް ގާނޫނީ އުސޫލުތަކާ ހިލާފަށްކަމަށް ބެލެވޭ ކަމަށް ޕްރޮސެކިއުޓާ ޖެނެރަލް (ޕީޖީ) އޮފީހުން ބުނެފި އެވެ.

އެފްއޭއެމްގެ ފައިސާއަށް ހިޔާނާތްތެރިވެ، މަނީ ލޯންޑްރިންގެ އަމަލުތައް ހިންގި މައްސަލައިގައި، ބައްސާމް އަށް ވަނީ، ކުށް ސާބިތުވާ ކަމަށް ކަނޑައަޅައި 23 އަހަރަށް ޖަލަށް ލާން ހުކުމްކޮށްފަ އެވެ. ނަމަވެސް، މިގޮތަށް ނިންމި އިރު ކްރިމިނަލް ކޯޓުން ވަނީ، އަމިން ކޮންސްޓްރަކްޝަންގެ މައްޗަށް ކުށް ސާބިތު ނުވާ ކަމަށް ނިންމާފަ އެވެ.

މި ކަމާ ގުޅިގެން ޕީޖީއިން ބުނީ، އަމީން ކޮންސްޓްރަކްޝަންގެ މައްޗަށް ހުށަހެޅި ދައުވާ ސާބިތުނުވާކަމަށް ކޯޓުން ހުކުމްކޮށްފައިވަނީ ޝަރުއީ އަދީ ގާނޫނީ އުސޫލުތަކާ ހިލާފަށްކަމަށް ބެލެވޭ ކަމަށެވެ. އެހެންކަމުން، މި މައްސަލަ ހައިކޯޓުގައި އިސްތިއުނާފުކުރުމަށް ޕީޖީ އޮފީހުން ގަސްދުކުރާ ކަމަށް ބުންޏެވެ.

މި މައްސަލައިގައި އަމީން ކޮންސްޓްރަކްޝަންގެ މައްޗަށް ކުރަނީ މަނީ ލޯންޑްރިންއަށް އެހީތެރިވުމުގެ ދައުވާ އެވެ. އެއީ ފީފާ އިން އެފްއޭއެމަށް ދިން އެއް މިލިއަން ޑޮލަރު ބޭނުންކޮށްގެން ބައްސާމް އަމީން އެވެނިއުއިން ޕެންޓް ހައުސް އެޕާޓްމަންޓް ގަތުމުގައި އެ ކުންފުނިން އެހީތެރިވެދީފައިވާތީ އެވެ.