ސަރުކާރުން މީޑިއާތަކަށް ދޫކުރުމަށް ނިންމާފައިވާ މާލީ އެހީއަށް އެދި ހުށަހެޅި މީޑިއާތަކުގެ ތެރެއިން ޝަރުތު ހަމަވާ 39 މީޑިއާއަކަށް ފައިސާ ދޫކުރުމުގެ މަސަތްކަތް ކުރަމުންދާ ކަމަށް މޯލްޑިވްސް މީޑިއާ އެންޑް ބްރޯޑްކާސްޓިން ކޮމިޝަނުން ބުނެފި އެވެ.

މީޑިއާ ކޮމިޝަނުން ބުނި ގޮތުގައި، ފައިސާ ދޫކުރުމުގެ މަސަތްކަތް ކުރިޔަށް ގެންދާނީ މިނިސްޓްރީ އޮފް ޔޫތު އެމްޕަވާމަންޓް، އިންފޮމޭޝަން އެންޑް އާޓްސްއިންނެވެ.  އެކޮމިޝަނުން ބުނި ގޮތުގައި، މީޑިއާތަކަށް މާލީ އެހީ ދިނުމަށް ކަނޑައަޅާފައިވާ އުސޫލަށް ބަދަލުތަކެއް ގެނެސް ފުރުސަތު ހުޅުވާލުމުން، ޖުމްލަ 57 މީޑިއާއަކުން ޕޯޓަލްގައި ވަނީ ޕްރޮފައިލް ހަދާފަ އެވެ. ނަމަވެސް، މީގެ ތެރެއިން ކަނޑައެޅިފައިވާ ޝަރުތުތައް ހަމަވެފައިވަނީ 41 މީޑިއާއަކަށެވެ.

އެކަމަކު، އެއް ކުންފުންޏަކުން ހިންގާ ދެ މީޑިއާއަކުން ދައުލަތުގެ މާލީ އެހީއަށް އެދިފައިވާކަން ފާހަގަވުމުން، އެ މީޑިއާއާ ކޮމިޝަނުން ބައްދަލުކޮށް ހިންގާފައިވާ ގޮތް އޮޅުންފިލުވައިދީ، އެ މީޑިއާގެ ޕޭމެންޓު ވަނީ ހޯލްޑު ކޮށްފަ އެވެ.

ކޮމިޝަނުން އިތުރަށް ހާމަކުރި ގޮތުގައި، ދައުލަތުގެ އެހީ ލިބޭނީ ޖުމްލަ 40 މީޑިއާއަކަށެވެ. އެއީ މިހާރު ފައިސާ ހިފެހެއްޓި ދެ މީޑިއާގެ ތެރެއިން އުސޫލުގެ ތެރެއިން އެއް މީޑިއާ ހިމަނައިގެންނެވެ.

ޝަރުތު ހަމަވި ބާކީ 39 މީޑިއާއަށް ފައިސާ ދޫކުރުމުގެ އިދާރީ މަސައްކަތްތައް ޔޫތު މިނިސްޓްރީއާއި ފިނޭންސް މިނިސްޓްރީ ގުޅިގެން މިހާރު ދަނީ ކުރަމުންނެވެ. މިއީ މީޑިއާތައް ބާރުވެރިކުރުވުމަށް ރައީސުލްޖުމްހޫރިއްޔާ ޑރ. މުހައްމަދު މުއިއްޒުގެ ސަރުކާރުން ކުރިއަށްގެންދާ މުހިންމު މަސައްކަތެކެވެ.