ހިއުމަން ރައިޓްސް ކޮމިޝަން އޮފް ދަ މޯލްޑިވްސް (އެޗްއާރުސީއެމް) ގެ ރައީސްކަމުގެ މަގާމަށް، ކުރީގެ އެގްރިކަލްޗާ މިނިސްޓަރު ޑރ. އައިޝަތު ރަމީލާ އައްޔަންކުރުމަށް ރައްޔިތުންގެ މަޖިލީހުން މިއަދު ރުހުން ދީފި އެވެ.
ޑރ. އައިޝަތު ރަމީލާ އެޗްއާރްސީއެމްގެ މެންބަރުކަމަށް އައްޔަންކުރެއްވީ މިދިޔަ ޑިސެމްބަރު މަހުގެ ތެރޭގަ އެވެ. އޭނާ އެ ކޮމިޝަންގެ ރައީސްކަމަށް އައްޔަންކުރެއްވުމަށް ރައީސުލްޖުމްހޫރިއްޔާ ޑރ. މުހައްމަދު މުއިއްޒު މަޖިލީހަށް ހުށަހެޅުއްވީ މި މަހުގެ 3 ވަނަ ދުވަހު އެވެ. މި ހުށަހެޅުއްވުމާ ގުޅިގެން، މަޖިލީހުގެ ހިއުމަން ރައިޓްސް އެންޑް ޖެންޑާ ކޮމިޓީން މައްސަލަ ދިރާސާކުރުމަށްފަހު، ރަމީލާ އެ މަގާމަށް އައްޔަންކުރުމަށް ފެންނަކަމަށް ނިންމި އެވެ.
ދައުރުން ބޭރުން މިއަދު ބޭއްވި މަޖިލީހުގައި ޖަލްސާގައި މި ނިންމުން ފާސްކޮށްފައިވަނީ ވޯޓުގައި ބައިވެރިވެވަޑައިގަތް 38 މެންބަރުންގެ ތާއީދާއެކުގަ އެވެ. އެޗްއާރުސީއެމްގެ މެންބަރުކަަމަށް ރަމީލާ އައްޔަނުކުރަނީ، އެ ކޮމިޝަންގެ ރައީސްގެ މަޤާމުގައި ހުންނެވި މަރިޔަމް މުނާގެ މަގާމުގެ މުއްދަތު ހަމަވުމުންނެވެ.
އެޗްއާރްސީއެމްގައި ޖުމްލަ ފަސް މެންބަރުން ތިބެ އެވެ. އެ ކޮމިޝަންގައި މިހާރު ތިއްބެވީ ރައީސް މަރިޔަމް މުނާ، ނައިބު ރައީސް މުހައްމަދު ޝަފީގު މަހުމޫދު، މެންބަރު ސަމާއު އަހުމަދު ނަޖީބާއި އިސްމާއީލް ހަބީބް އަދި އަހުމަދު މައުސޫމެވެ.
