ގދ. ތިނަދޫގެ ބިން ހިއްކުމާއި ގޮނޑުދޮށް ހިމާޔަތްކުރުމުގެ ބޮޑު މަޝްރޫއުގެ މަސައްކަތްތައް ބާރުދުވެލީގައި ކުރިއަށްދާކަމަށް (މޯލްޑީވްސް ޓްރާންސްޕޯޓް އެންޑް ކޮންޓްރެކްޓިން ކޮމްޕެނީ) އެމްޓީސީސީން ބުނެފި އެވެ.
މި މަޝްރޫއުގެ އެންމެ ފަހުގެ މައުލޫމާތު ހިއްސާކުރަމުން އެމްޓީސީސީން ބުނީ މިހާތަނަށް 187,478 އަކަމީޓަރުގެ ސަރަހައްދެއް ހިއްކާފައިވާ ކަމަށެވެ. އަދި ގޮނޑުދޮށް ހިމާޔަތްކުރުމުގެ ދަށުން ހިލަ ބޭނުންކޮށްގެން 835 މީޓަރުގެ ސަރަހައްދެއްގައި ރިވެޓްމަންޓް ޖެހުމާއި، 50 މީޓަރުގެ ސަރަހައްދެއްގައި ޖިއޯބޭގް ބޭނުންކޮށްގެން ގޮނޑުދޮށް ހިމާޔަތްކުރުމުގެ މަސައްކަތްވެސް މިހާރު ވަނީ ނިމިފަ އެވެ.
މީގެއިތުރުން މި މަޝްރޫއުގެ ދަށުން ރިޓެއިނިން ވޯލް ހެދުމާއި، ރައްޔިތުން މުނިފޫހިފިލުވުމަށް ބޭނުންކުރާނެ ޕިކްނިކް އައިލެންޑެއް ހިއްކުމުގެ އިތުރުން، ޖެޓީ ހެދުމުގެ މަސައްކަތްތައް ވެސް ކުރިއަށްދާނެ ކަމަށް އެ ކުންފުނިން ވަނީ ބުނެފަ އެވެ. މި މަޝްރޫއުގެ އެއްބަސްވުމުގައި މިނިސްޓްރީއާއި އެމްޓީސީސީ އާ ދެމެދު ސޮއިކޮށްފައިވަނީ 1 ޖޫން 2023ގަ އެވެ.
