ފުޓުބޯޅަ އެސޯސިއޭޝަން އޮފް މޯލްޑިވްސް (އެފްއޭއެމް) އަށް ފީފާއިން ދިން ފައިސާއަށް ހިޔާނަތްތެރިވިކަން ސާބިތުވެ 9 އަހަރުގެ ޖަލު ހުކުމެއް ކޮށްފައިވާ އެ އެސޯސިއޭޝަންގެ ކުރީގެ ރައީސް ބައްސާމް އަދީލް ޖަލީލްގެ މައްޗަށް އިތުރު ދެ ދައުވާއެއް ސާބިތުވެއްޖެ އެވެ.
ބައްސާމްގެ މައްޗަށް މިފަހަރު ސާބިތުވީ ހިޔާނާތާއި އެފްއޭއެމަށް ފީފާއިން ފޮނުވި 1.2 މިލިއަން ޑޮލަރަށް ހިޔާނާތްތެރިވި ކަމަށް ބުނެ ދައުލަތުން އޭނާގެ މައްޗަށް އުފުލި ހިޔާނާތާއި މަނީ ލޯންޑަރިންގެ ދައުވާ އެވެ. ދައުލަތުން ތުހުމަތުކުރި ގޮތުގައި ކޮވިޑް-19 ގައި ދިމާވި މާލީ ދަތިތަކާ ގުޅިގެން ފީފާއިން އެފްއޭއެމަށް ދޫކުރި 1.2 މިލިއަން ޑޮލަރު ބޭނުންކުރީ، އަމީން ކޮންސްޓްރަކްޝަނުން ދެ ޕެންޓްހައުސް ގަތުމަށެވެ.
މި މައްސަލައާ ގުޅިގެން ބައްސާމަށް ހުކުމްކުރުމަށް މިއަދު ބޭއްވި ކްރިމިނަލް ކޯޓުގެ އަޑުއެހުމުގައި މައްސަލަ ބެއްލެވި ގާޒީ މުހައްމަދު މިސްބާހު ވިދާޅުވީ އެ ފައިސާ އެފްއޭއެމުން ނެރުނުއިރު، ވަކި ޗެކެއް ބޭނުންކޮށްގެން އެ ފައިސާ އަނބުރާ މާރުކުރުމަށްފަހު އެ އިދާރާއަށް ވެއްދި ކަމަށެވެ. އެކަމަކު، އެއީ ސައްހަ ޗެކުތަކެއް ނޫން ކަމަށާއި އެ ފައިސާ އެފްއޭއެމްގެ އެކައުންޓަށް ވަދެފައިވާކަން ކަން އެނގެން ކަމަށެވެ.
މީގެއިތުރުން އަމީން އެވެނިއު އިން އެޕާޓްމެންޓް ގަންނަން ނަގުދު ފައިސާ ބައްސާމަށް ދެއްކީ އެހެން މީހަކު ކަމަށް ބުންޏަސް، އެއީ ގަބޫލު ކުރެވޭނެ ވާހަކައެއް ނޫން ކަމަށް ގާޒީ ވަނީ ވިދާޅުވެފަ އެވެ. އަދި އެ އެޕާޓްމެންޓް ގަތުމަށްޓަކައި އޭނާ 61 ދުވަހުގެ ތެރޭގައި އަމީން ކޮންސްޓްރަކްޝަނަށް 1 މިލިއަން ރުފިޔާ ދެއްކިއިރު އެހާ ބޮޑު އަދަދެއްގެ ފައިސާ ކުޑަ ދުވަސްކޮޅެއްގެ ތެރޭގައި ދެވޭނީ ހިލޭ އެހީއެއް ނުވަތަ ލޯނެއް ނުވަތަ ވިޔަފާރީގެ ނަފާއެއް ލިބިގެން ކަމަށެވެ. އެކަމަކު އެފަދަ އާމްދަނީއެއް ނުވަތަ އެހީއެއް ބައްސާމަށް ލިބުނުކަން އޭނާ އަށް ސާބިތުކޮށްދެވިފައިނުވާ ކަމަށެވެ.
އެހެންވެ ކޯޓުން ވަނީ، ޑޮލަރު މާރުކުރަން ކަމަށް ބުނެ، އެފްއޭއެމުން ނެރުނު ފައިސާގެ އަސްލު އޮޅުވާލަން މަސައްކަތްކޮށް އެ ފައިސާއަށް ބައްސާމް ހިޔާނާތްތެރިވިކަން ސާބިތުވާ ކަމަށް ހުކުމްކޮށްފަ އެވެ. އަދަބު ކަނޑައެޅުން އެހެން ދުވަހަކަށް ތާވަލުކުރާނެ އެވެ.
ބައްސާމްގެ އިތުރުން އެފްއޭއެމްގެ ފިނޭންސްގެ ކުރީގެ ހެޑު މުހައްމަދު އަގީލާއި ހަސަން ވަހީދާއި އަމީން ކޮންސްޓްރަކްޝަނަށް ދައުލަތުން ވަނީ މި މައްސަލައިގައި ދައުވާކޮށްފަ އެވެ.
