ރިޔާސީ އިންތިޚާބާއި މަޖިލިސް އިންތިޚާބު އެއްކޮށްލައި ރައްޔިތުންގެ މަޖިލީހުގެ 20 ވަނަ ދައުރު ކުރު ކުރަން ރައްޔިތުންގެ މަޖިލީހަށް ހުށަހަޅައިފި އެވެ.
ރައްޔިތުންގެ މަޖިލީހަށް މި ބިލު ހުށަހެޅުއްވީ ޕީއެންސީގެ ޕާލިމެންޓްރީ ގްރޫޕްގެ ލީޑަރު އަދި އިނގުރައިދޫ ދާއިރާގެ މެމްބަރު އިބްރާހިމް ފަލާހު އެވެ.
މި ބިލުގައި ބުނީ މީގެ ބޭނުމަކީ ބޭނުމަކީ ރިޔާސީ އިންތިޚާބާއި މަޖިލިސް އިންތިޚާބު އެއްކޮށްލުން ކަމަށެވެ. އަދި މަޖިލީހުގެ ދައުރު ގުނުމުގެ އުސޫލު އިސްލާހުކޮށް، ގާނޫނު އަސާސީއަށް ގެންނަން ޖެހޭ އިސްލާހުތައް ގެނައުން ކަމަށް ވެސް ބުނެފައިވެ އެވެ.
މި ބިލުގެ މަސައްކަތްތައް ކުރުމަށް މި މަހުގެ 5 ވަނަ ދުވަހު ވަނީ ދައުރުން ބޭރު ޖަލްސާއެއް ތާވަލްކޮށްފަ އެވެ.
މަޖިލީހުގެ އިދާރާއިން މައުލޫމާތު ދޭގޮތުގައި،
މަޖިލީހަށް ހުށަހެޅުމަށް ހަމަޖެހިފައިވާ ބިލުތަކަކީ:
- ގާނޫނުލްއުގޫބާތަށް އިސްލާހު ގެނައުމުގެ ބިލު (ހުށަހެޅުއްވީ ހިތަދޫ މެދު ދާއިރާގެ މެންބަރު އަހްމަދު އަޒާން މަރުޒޫގު)
- ޕެންޝަނާ ބެހޭ ގާނޫނަށް އިސްލާޙު ގެނައުމުގެ ބިލު (ހުށަހެޅުއްވީ މިލަންދޫ ދާއިރާގެ މެންބަރު ހަސަން މުފީދު)
- ގާނޫނުއަސާސީއަށް އިސްލާޙު ގެނައުމުގެ ބިލު (ހުށަހެޅުއްވީ އިނގުރައިދޫ ދާއިރާގެ މެންބަރު އިބްރާހިމް ފަލާހު)
މީގެއިތުރުން، ގައުމީ ތަރައްގީއާއި ތަރިކައިގެ ކޮމިޓީން ދިރާސާކޮށް ނިންމާފައިވާ ރީ-އެމްޕްލޯއިމަންޓް ބިލުގެ ރިޕޯޓު މަޖިލީހަށް ހުށަހަޅައި، އެ ބިލަށް ބަހުސްކުރުމާއި ވޯޓަށް އެހުންވެސް މާދަމާގެ ޖަލްސާގައި ކުރިއަށްދާނެ އެވެ.
ރައްޔިތުންގެ މަޖިލީހުގެ މިދިޔަ އަހަރުގެ ދައުރުތައް ނިމި، މެންބަރުން މިހާރު ތިއްބެވީ ޗުއްޓީގަ އެވެ. މަޖިލީހުގެ މިއަހަރުގެ ރަސްމީ ޖަލްސާތައް އަންނަ މަހު ފެށުމަށް ހަމަޖެހިފައިވީ ނަމަވެސް، މުހިންމު މަސައްކަތްތަކެއް ނިންމުމަށްޓަކައި މިހާރު ވަނީ ދައުރުން ބޭރުން ޖަލްސާތައް ބާއްވަން ފަށާފަ އެވެ.
