ހއ. ދިއްދޫގެ އެއާޕޯޓު އެޅުމަށް ބިން ހިއްކުމުގެ މަޝްރޫއުގެ އަމަލީ މަސައްކަތް މާދަމާ ފަށަން ތައްޔާރުވެފައިވާ ކަމަށް މޯލްޑިވްސް އެއާޕޯޓް ކޮމްޕެނީ ލިމިޓެޑް (އެމްއޭސީއެލް) އިން ބުނެފި އެވެ.
ދިއްދޫ އެއާޕޯޓެއް ގާއިމްކުރުމަކީ ރައީސުލްޖުމްހޫރިއްޔާ ޑރ. މުހައްމަދު މުއިއްޒު ރިޔާސީ ކެމްޕޭނުގައި ވެސް ވެވަޑައިގެންނެވި ވައުދެކެވެ. އަދި އެ މަސައްކަތުގެ އަމަލީ މަސައްކަތް ފެށުމަށް މިހާފރު ތައްޔާރުވެފައިވާއިރު މިދިޔަ އޭޕްރިލް މަހު އެ ރަށަށް ވަޑައިގެން ވެސް އެމަނިކުފާނު ވަނީ އަވަހަށް އެ މަސައްކަތް ނިންމަވާނެ ކަމުގެ ޔަގީންކަން ރައްޔިތުންނަށް އަރުވާފަ އެވެ.
އެމްއޭސީއެލް އިން މިހާރު ތައްޔާރުވެފައިވާ މި މަޝްރޫއަށް ބޭނުންކުރަނީ ދުނިޔޭގެ އެންމެ ބޮޑު ޑްރެޖަރު ކަމަށްވާ "ލީވް އެރިކްސަން" ކަމަށް އެ ކުންފުނިން ބުނެ އެވެ. އެއް ފަހަރާ 46,000 ކިއުބިކް މީޓަރުގެ ވެލި ޕަމްޕު ކުރުމުގެ ގާބިލުކަން ހުރި މި ޑްރެޖަރަކީ، ރާއްޖޭގެ އެކި ސަރަހައްދުތަކުގައި ހިންގާ ބިން ހިއްކުމުގެ މަޝްރޫއުތައް އަވަސްކުރުމަށްޓަކައި އެމްއޭސީއެލް މެދުވެރިކޮށް ސަރުކާރުން ގެނައި ތިންވަނަ ޑްރެޖަރެވެ. މި މަޝްރޫއުގެ ދަށުން ޖުމްލަކޮށް ހިއްކަން ޖެހޭނީ 102.70 ހެކްޓަރެވެ.
ސަރުކާރުން އަންނަނީ ތަރައްގީގެ މަޝްރޫއުތައް ބާރުސްޕީޑުގައި ކުރިއަށް ގެންދިއުމަށް ގިނަ މަސައްކަތްތަކެއް ކުރަމުންނެވެ. އެގޮތުން، އެމްއޭސީއެލް އިން މީގެ ކުރިން ގެނައި ބޮޑު ދެ ޑްރެޖަރު ބޭނުންކޮށްގެން ހުޅުމާލެ ފޭސް 3 އާއި ރަސްމާލެ ހިއްކުމުގެ މަސައްކަތްވެސް މިހާރު ދަނީ ބާރުސްޕީޑުގައި ކުރިއަށެވެ.
ދިއްދޫއަކީ އާބާދީ ބޮޑު، ބިމުގެ ދަތިކަން އިންތިހާއަށް ކުރިމަތިވެފައިވާ ރަށަކަށް ވުމާއެކު، މާދަމާ ފެށޭ މި މަޝްރޫއަކީ އެ ރަށުގެ ރައްޔިތުންނަށް ލިބިގެންދާނެ ވަރަށް ބޮޑު އުފަލަކާއި ހިތްހަމަޖެހުމެކެވެ.
