މިއަހަރާއި އަންނަ އަހަރަކީ ވިޔަފާރިވެރިންނަށް އުއްމީދީ އަދި އެމީހުންގެ ހިތަށް ތަސައްލީ ލިބިގެންދާނެ ދެ އަހަރު ގެ ގޮތުގައި އިކޮނޮމިކް މިނިސްޓަރު މުހައްމަދު ސައީދު މިއަދު ސިފަކުރައްވައިފި އެވެ.

މިނިސްޓަރު މިފަދައިން ވިދާޅުވީ، ސަރުކާރުގެ މަސައްކަތްތަކާއި ސިޔާސަތުތައް ހާމަކޮށްދިނުމަށް އަލަށް ފެށި "ތަރުޖަމާނާއެކު" ޕްރޮގްރާމުގެ ފުރަތަމަ އެޕިސޯޑުގައި ވާހަކަދައްކަވަމުންނެވެ. އޭނާ ވިދާޅުވީ، ކުރިޔަށް އޮތް ދެއަހަރަކީ ރާއްޖޭގެ ކުދި ވިޔަފާރިތަކަށް ހިންގާ މީހުންގެގެ ހިތަށް ތަސައްލީއެއް ލިބޭނެ ދެއަހަރު ކަމަށެވެ.

މިނިސްޓަރު އިތުރަށް ވިދާޅުވި ގޮތުގައި، ރައީސް ޑރ. މުއިއްޒަކީ ރައްޔިތުންގެ އިހުސާސްތައް އަޑުއައްސަވައި، އެދޭ ކަންކަމަށް އަމަލީ ނަތީޖާ ހޯއްދަވައިދެއްވުމަށް އެންމެ ބޮޑު އިސްކަމެއް ދެއްވާ ރައީސެވެ. އެގޮތުން ވިޔަފާރިވެރިންނަށް ކުރިމަތިވާ ދަތިތައް ހައްލުކޮށް، އިގްތިސާދީ ފުރުސަތުތައް ފަހިކޮށްދިނުމަށް ސަރުކާރުން ހަރުދަނާ ފިޔަވަޅުތަކެއް އަޅަމުން އަންނަކަމަށް ވިދާޅުވި އެވެ.

އެގޮތުން، އެއާޕޯޓުން މުދާ ކްލިއާކުރުމަށް ލިބޭ މުއްދަތު 120 ގަޑިއިރަށް އިތުރުކުރުމަށް ކަސްޓަމްސްއިން ނިންމުމަކީ ކުދި އަދި މެދުފަންތީގެ ވިޔަފާރިތަކަށް ލިބޭނެ ބޮޑު ލުޔެއް ކަމަށް މިނިސްޓަރު ސައީދު ވިދާޅުވިއެވެ. މީގެ އިތުރުން، އެކި ސަބަބުތަކާހުރެ ޓެކްސް ދެއްކުމުގައި ދަތިތައް ކުރިމަތިވެފައިވާ ވިޔަފާރިތަކަށް މީރާ މެދުވެރިކޮށް ލުއި ގޮތްތަކެއް ހޯދައިދިނުމަށް ފިނޭންސް މިނިސްޓްރީން ކުރަމުންދާ މަސައްކަތްތަކީވެސް ވިޔަފާރިވެރިންގެ ކަންބޮޑުވުންތަކަށް ލިބޭނެ ހައްލެއްކަން އޭނާ ފާހަގަކުރެއްވި އެވެ.

މީގެއިތުރުން މިނިސްޓަރު ވިދާޅުވީ ފާއިތުވި އަހަރު ބޭއްވި އެކްސްޕޯއަކީ ވަރަށް ފުޅާ ދާއިރާއެއްގައި ބޭއްވުނު ގިނަ ކުދި އަދި މެދުފަންތީގެ ވިޔަފާރިތަކުގެ ބައިވެރުން އޮތް އެކްސްޕޯއެއް ކަމަށެވެ. އަދި 2026 ވަނަ އަހަރުގެ އެކްސްޕޯއަކީ ކުރީގެ އެކްސްޕޯއަށްވުރެ މާ ފުޅާ ދާއިރާއެއްގައި، ކުރިއާލައި އިއުލާނުކުރެވި، ކުރިއަށްވުރެ ގިނަ ވިޔަފާރިތަކަށް ބައިވެރިވުމުގެ ފުރުސަތު ލިބޭ އެކްސްޕޯއަކަށްވާނެ ކަމުގައިވެސް ވިދާޅުވި އެވެ.