ހުކުރު ހުތުބާ ދިނުމުގެ މިނިވަންކަން ހުރިހާ އެންމެންނަށް ހުޅުވާލައިފިނަމަ، ދީނީ ގޮތުން ބައިބައިވުން އުފެދި ގައުމު ނުތަނަވަސް ހާލަތަކަށް ވެއްޓިދާނެ ކަމަށް އިސްލާމިކް މިނިސްޓަރު ޑރ. މުހައްމަދު ޝަހީމް އަލީ ސައީދު ވިދާޅުވެއްޖެ އެވެ.
މިނިސްޓަރު މިފަދައިން ވިދާޅުވީ، އިލްމުވެރިންނަށް އަމިއްލަ މައުލޫއަށް ހުތުބާ ދިނުމުގެ މިނިވަންކަން އޮންނަންޖެހޭނެ ކަމަށް ކުރީގެ އުއްތަމަ ފަނޑިޔާރު ޑރ. އަހްމަދު އަބްދުﷲ ދީދީ ވިދާޅުވުމާ ގުޅިގެންނެވެ. ޝަހީމް ފާހަގަކުރެއްވި ގޮތުގައި، ހުރިހާ އިމާމުންނަކީ އަމިއްލައަށް ހުތުބާ ތައްޔާރުކުރުމުގެ ގާބިލުކަން ހުރި ބައެއް ނޫން ކަމަށާއި، ވަކި ހަމައެއް ނެތި އެކަން ދޫކޮށްލުމުން އެކި މަޒުހަބުތަކުގެ ފިކުރުތައް ފެތުރި ހަމަނުޖެހުން އުފެދުމުގެ ފުރުސަތު އޮންނާނެ އެވެ.
މީގެއިތުރުން، ހައްދެއް އިމެއް ނެތި އެގޮތަށް މިކަން އެންމެންނަށް ހުޅުވާލައިފިނަމަ ދީނީ ގޮތުން ނުތަނަވަސް ހާލަތަކަށް ރާއްޖެ ވެއްޓިގެން ދިޔުމުގެ ބިރު އޮންނާނެ އެވެ. އަދި އެކަމަށް ޖާގައެއް ނުދޭނެ ކަމަށްވެސް ޝަހީމް ވިދާޅުވި އެެވެ.އަދި ރާއްޖޭގައި މިހާރު އޮތް އެއް ހުތުބާއެއް ކިޔުމުގެ ނިޒާމަކީ އިސްލާމީ އެހެން ގައުމުތަކުންވެސް މިހާރު ނަމޫނާއަކަށް ބަލަމުންދާ ކަމެއް ކަމަށާއި، ހުތުބާގެ މައުޟޫއަށް ރައްޔިތުންގެ ހިޔާލު ހޯދަނީ މުޖުތަމައަށް އެންމެ ބޭނުންތެރި މައުލޫމާތު ފޯރުކޮށްދިނުމަށް ކަމަށްވެސް މިނިސްޓަރު ވިދާޅުވި އެވެ.
