ކުދި އަދި މެދު ފަންތީގެ ވިޔަފާރިތަކަށް ވެމްކޯއިން ކުނި އުކާލުމުގައި ނަގާ ފީ ކުޑަކުރަން ނިންމައިފި އެވެ.
ވެމްކޯއިން ބުނީ މި ބަދަލަކީ ރައީސް ޑރ. މުހައްމަދު މުއިއްޒު ވެވަޑައިގެންފައިވާ ވައުދުފުޅާ އެއްގޮތަށް ގެނެވޭ ބަދަލެއް ކަމަށެވެ. އަދި މި ނިންމުމާ އެއްގޮތަށް އަގުތައް ކުޑަ ކުރެވޭނީ ފެބްރުއަރީ މަހުގެ ފުރަތަމަ ދުވަހުން ފެށިގެންކަމަށްވެސް ވެމްކޯއިން ބުންޏެވެ.
މީގެއިތުރުން، މިވަގުތު އެސްއެމްއީތަކުން ނަގަމުންދާ ފީތައް ކުޑަކުރުމަށް ވަކި ބޭންޑްތަކެއް ތަޢާރަފްކުރުމަށް މަޝްވަރާކުރަމުންދާ ކަމަށްވެސް ވެމްކޯއިން ވަނީ ބުނެފަ އެވެ. އަދި އެ މަޝްވަރާތަކަށްފަހު ކަނޑައެޅޭ ބޭންޑުތައް ކުރިއަށް އޮތް ދުވަސްތަކުގައި ވިޔަފާރިތަކަށް އެނގޭނެހެން އިއުލާންކުރާނެ ކަމަށް ވެމްކޯގެ ބަޔާނުގައި ބުނެފައިވެ އެވެ.
ކުދި އަދި މެދު ފަންތީގެ ވިޔަފާރިތަކަށް ވެމްކޯއިން ކުނި އުކާލުމުގައި ނަގާ ފީ ކުޑަކުރުމަށް ވިޔަފާރިވެރީނާ އެކު ބޭއްވި ބައްދަލުވުމުގައިވެސް ވަނީ އެދިފަ އެވެ.
