ކޭ-ޕާކްގެ ފްލެޓްތައް މަކަރާއި ހީލަތުން ނުއަގުގައި ވިއްކި މައްސަލާގައި ދައުލަތުން ކުރި ދައުވާތައް ސާބިތުވި ހަސަން މަމްދޫހު (މަންޑޭ)، 397 އަހަރަށް ޖަލަށްލުމަށް ކްރިމިނަލް ކޯޓުން މިއަދު ހުކުމްކޮށްފި އެވެ.
މަންޑޭ އަކީ ކޭޕާކް ރެސިޑޭންސީގެ މަސައްކަތް އެވޯޑުކުރި ހަންބޯ މޯލްޑިވްސް ކުންފުނީގެ ކުރީގެ ހިއްސާދާރެކެވެ، އޭނާ މިކަން ކުރީ ކުންފުނި މެދުވެރިކޮށެވެ. މި މައްސަލައާ ގުޅިގެން ދައުލަތުން އޭނާ އާ ދެކޮޅަށް 104 ދައުވާއެއް ކުރި އެވެ. އެއީ މަކަރާއި ހީލަތް ހެދުމުގެ 50 ދައުވާ އާއި އޮޅުވާލުމުގެ އަމަލެއް ކުރުމުގެ 50 ދައުވާ އާއި ސައްހަ ނޫން ލިޔުމެއް ދިނުމުގެ ތިން ދައުވާގެ އިތުރުން މަނީ ލޯންޑްރިންގެ ދައުވާއެއް އެވެ. އޭގެ ތެރެއިން 94 ދައުވާ ސާބިތުވި ކަމަށް ކްރިމިނަލް ކޯޓުން ވަނީ މިދިޔަ ހަފްތާގައި ކަނޑައަޅާފަ އެވެ،
އެހެންވެ، މިއަދު ކޯޓުގައި ކުރިއަށް ދިޔައީ އޭނާއަށް އަދަބު ކަނޑައެޅުމުގެ ބައެވެ. އެ އަޑުއެހުމުގައި ކޯޓުން ވަނީ 397 އަހަރަށް ޖަލަށް ލުމަށް ހުކުމްކޮށްފަ އެވެ.
- ޓެކުން (46 ދައުވާ) : 364 އަހަރަށް ޖަލަށްލުން
- އޮޅުވާލުމުގެ އަމަލެއް ކުރުން (44 ދައުވާ): 13 އަހަރާއި 2 މަހާއި 12 ދުވަހަށް ޖަލަށްލުން
- މީހަކަށް ކަމެއް އޮޅުވާލުމުގެ ނިޔަތުގައި އެނގިހުރެ ސައްހަނޫން ލިޔުމެއް ދިނުން (3 ދައުވާ): 1 އަހަރާއި 4 މަހާއި 24 ދުވަހަށް ޖަލަށްލުން
- މަނީ ލޯންޑްރިންގެ 1 ދައުވާ: 15 އަހަރަށް ޖަލަށްލުމާއެކު، 30 މިލިއަން ރުފިޔާއިން ޖޫރިމަނާކުރުން
- ޖުމްލަ: 393 އަހަރާއި، 7 މަހާއި، 6 ދުވަހަށް ޖަލަށްލުމާއެކު، 30 މިލިއަން ރުފިޔާއިން ޖޫރިމަނާކުރުން
މި މައްސަލާގައި މަންޑޭގެ މައްޗަށް ކޮށްފައިވާ މަނީ ލޯންޑްރިންގެ ދައުވާ ސާބިތުވެފައިވާތީ، އޭނާގެ އެޕާޓްމަންޓާއި، އެޕާޓްމަންޓާ ގުޅިފައިވާ ބޭސްމަންޓް ޕާކިން ސްލޮޓް ދައުލަތަށް ނެގުމަށް ވެސް އަމުރުކޮށްފައިވެ އެވެ.
މަމްދޫހުގެ އިތުރުން ދެން މި މައްސަލައިގައި ދައުވާ ކުރި ޖައިޝަން ސައީދަށް ވެސް މިއަދު ވަނީ އަދަބު ކަނޑައަޅާފަ އެވެ. އެއީ؛
- ޓެކުމުގައި ބައިވެރިވުން (45 ދައުވާ) : 140 އަހަރާއި 9 މަހާއި 18 ދުވަހަށް ޖަލަށްލުން
- އޮޅުވާލުމުގެ އަމަލެއް ކުރުން (40 ދައުވާ) :12 އަހަރާއި 4 މަހާއި 18 ދުވަހަށް ޖަލަށްލުން
- މީހަކަށް ކަމެއް އޮޅުވާލުމުގެ ނިޔަތުގައި އެނގިހުރެ ސައްހަނޫން ލިޔުމެއް ދިނުން ( 3 ދައުވާ): 1 އަހަރާއި 4 މަހާއި 24 ދުވަހަށް ޖަލަށްލުން
- މަނީ ލޯންޑަރކުރުމަށް އެހީތެރިވުމުގެ 1 ދަޢުވާ: 5 އަހަރަށް ޖަލަށްލުމާއެކު، 300 ހާސް ރުފިޔާއިން ޖޫރިމަނާކުރުން
- ޖުމްލަ: 159 އަހަރާއި، 7 މަހަށް ޖަލަށްލުމާއެކު، 300 ހާސް ރުފިޔާއިން ޖޫރިމަނާކުރުން
