ނޯތު ހާބަރުގެ ހިދުމަތް ހޯދާ ކަނޑު އުޅަނދުފަހަރުތަކަށް އެމްއެމްއޭ ކުރިމަތީގައި ވަގުތީ ގޮތުން ޕާކުކޮށްފައިވާ ކަނޑު އުޅަނދުފަހަރުތައް ބޭއްވޭނީ، އެންމެ ގިނަވެގެން 10 ދުވަސްވަންދެންކަމަށް މޯލްޑިވްސް ޕޯޓްސް ލިމިޓެޑް (އެމްޕީއެލް)އިން ބުނެފި އެވެ.

ބޮޑުތަކުރުފާނު މަގުގެ ސެގްމެންޓް 2ގެ މަސަތްކަތް ކުރުމަށް، ލޯކަލް މާރުކެޓްގެ ހުޅަނގަށް 100 މީޓަރު ސަރަހައްދުގައި ހިމެނޭ ކަނޑު އުޅަނދުތައް އެމްއެމްއޭ ކުރިމަތީގައި ވަގުތީ ގޮތުން ޕާކުކުރެވޭނެ އިންތިޒާމް އެމްޕީއެލްއިން ވަނީ ހަމަޖައްސާފަ އެވެ. އެމްޕީއެލްއިން ބުނި ގޮތުގައި، މި ސަރަހައްދު ކީވޯލުގައި އުޅަނދުފަހަރުތައް ބޭއްވޭނީ އެންމެ ގިނަވަގެން 10 ދުވަހުގެ މުއްދަތަށް ކަމަށާއި، 10 ދުވަހަށްވުރެ އިތުރަށް ކީވޯލްގައި އުޅަނދެއް ބާއްވަން ބޭނުންވާނަމަ، އެ އުޅަނދަށް ކީވޯލާއި ކައިރި ކުރެވޭނީ އަލުން ކިޔުގައި ނޯޓުކުރުމަށްފަހު، ކިޔު ތަރުތީބުން ކަމަށެވެ.

އެމްޕީއެލްއިން ބުނީ އެ ކުންފުނިން އަމަލުކުރަން ނިންމާފައިވަނީ ހުރިހާ އުޅަނދުފަހަރަށް ވެސް އިންސާފުވެރި، ހަމަހަމަ އުސޫލަކުން ހިދުމަތް ދިނުމުގެ ބޭނުމުގައިކަމަށެވެ.

ބޮޑުތަކުރުފާނުމަގު ފުޅާކޮށް ތަރައްގީކުރުމުގެ މަޝްރޫއުގެ ދެވަނަ ފިޔަވަހީގެ މަސައްކަތް ތިން މަސް ދުވަހުގެ މުއްދަތަކަށް ކުރިއަށް ގެންދިއުމަށް ވަނީ ހަމަޖެހިފަ އެވެ. މި މަސައްކަތުގެ ތެރެއިން، މާލޭ ނޯތު ހާބަރު ސަރަހައްދުގެ މަސައްކަތް ވަނީ މިމަހުގެ 20 ވަނަ ދުވަހު ފަށާފަ އެވެ.