މާލޭގައި ދިރިއުޅޭ އެހެން ރަށްރަށުގެ މީހުންނަށް ރަސްމާލެއިން ގޯތުދޫކުރުމަށް ކަނޑައަޅައި މާލެ ސަރަހައްދުން ގޯތި ދޫކުރާ އުސޫލު ރޭ އާއްމުކޮށްފި އެވެ.
ސަރުކާރުން އާއްމުކުރި އުސޫލުގެ ދަށުން މާލެ ސަރަހައްދުން ގޯތި ދޫކުރަނީ ދެ ކަޓަގަރީއެއްގެ ދަށުން ނެވެ. އެގޮތުން
- ކެޓަގަރީ 1 ގެ މާލޭ ރަށްވެހިންނަށް ދަށުން ގޯތިދޫކުރާނީ ގްރޭޓާ މާލެ ސަރަހައްދާއި ރަސްމާލޭން
- ކެޓަގަރީ 2 ގެ ދަށުން މާލޭގައި ދިރިއުޅޭ އެހެން ރަށްވެހިންނަށް ގޯތި ދޫކުރާނީ ރަސްމާލޭން
މި އުސޫލުގެ ދަށުން ދޫކުރާނީ 1250 އަކަފޫޓުގެ ގޯއްޗެވެ.
ސަރުކާރުން މީގެކުރިން ހާމަކުރި ގޮތުގައ ރަސްމާލެއިން 25،000 ގޯތި ދޫކުރާނެ އެވެ. ފުރަތަމަ ބުރުގެ ދަށުން 15،000 ގޯތި ދޫކުރުމަށް ހަމަޖެހިފައިވާއިރު ރަސްމާލެ ހިއްކާ ނިންމުމުގެ ކުރިން އެ ސަރަހައްދުން ގޯތި ލިބޭ މީހުން ކަނޑައަޅާނެ ކަމަށް ވެސް ވަނީ ބުނެފަ އެވެ. އެ ސަރަހައްދު ކުރިއަށް އޮތް ތިން މަސް ދުވަހުގެ ތެރޭގައި ހިއްކައި ނިންމާނެ ކަމަށް ރައީސުލްޖުމްހޫރިއްޔާ ޑރ. މުހައްމަދު މުއިއްޒު ވަނީ ވިދާޅުވެފަ އެވެ.
ސަރުކާރުގެ އުސޫލުގެ ދަށުން މާލޭ ރަށްވެހިން ކަމަށް ބަލާ މިންގަނޑުގެ ތެރޭގައި ހިމެނެނީ:
- އުފަންވިއިރުން ފެށިގެން މާލޭގެ ގެއެއްގެ ރަށްވެހިންގެ ރެޖިސްޓްރީގައި ރެޖިސްޓްރީވެފައިވާ ފަރާތްތައް
- މާލޭގެ ރަށްވެހިންގެ ދަފްތަރުގައި ރެޖިސްޓްރީވެފައިވާ ފަރާތްތައް
- މާލޭގެ ގެއެއްގެ ރަށްވެހިންގެ ރެޖިސްޓްރީގައި ފަހުން ރެޖިސްޓްރީވެފައިވާ ފަރާތްތައް
ކެޓަގަރީ 2 ގެ ދަށުން ގޯތި ދޫކުރާނީ އުސޫލުގައި ވާގޮތުން 14 ޖެނުއަރީގެ ނިޔަލަށް މާލޭގައި މެދުނުކެނޑި ދިރިއުޅޭތާ 15 އަހަރުވެފައި މީހުން ނަށެވެ.
ކޮންމެ ކެޓަގަރީއަކުން އެންމެ ގިނަވެގެން ލިބޭނީ 125 ޕޮއިންޓެވެ. އެގޮތުން އުފަންވީއްސުރެ ފެށިގެން މާޅޭގެ ގެއެއްގެ ރަށްވެހިންގެ ރެޖިސްޓްރީގައި ރެޖިސްޓްރީވެފައިވާ ފަރާތްތަކަށް 40 ޕޮއިންޓް ލިބެ އެވެ.
މާލޭގައި ދިރިއުޅޭ 15 އަހަރަށް ވުރެ ގިނަ ދުވަސްވެފައިވުމާއެކު 20 އަހަރު ވެފައިވާ މީހުންނަށް 20 ޕޮއިންޓް ލިބޭނެ ކަމަށް އުސޫލުގައި ވެ އެވެ. މާލޭގައި ދިރިއޫޅޭތާ 20 އަހަރު ނުވަތަ 20 އަހަރަށް ވުރެ ގިނަ ދުވަސްވެފައިވުމާއެކު 25 އަހަރު ވެފައި ނުވާނަމަ 30 ޕޮއިންޓް އަދި މާލޭގައި ދިރިއުޅޭތާ 25 އަހަު ނުވަތަ 25 އަހަރަށް ވުރެ ގިނަ ދުވަސްވުމާއެކު 30 އަހަރު ވެފައިނުވާ ނަމަ 35 ޕޮއިންޓް ލިބޭނެ އެވެ.
