2062 ވަނަ އަހަރު ދިވެހިރާއްޖޭގައި މަސައްކަތްކުރާ ބިދޭސީ ފިރިހެނުންގެ އަދަދު، ދިވެހި ފިރިހެނުންނަށްވުރެ 40،000 އިން އިތުރުވާނެކަމަށް މޯލްޑިވްސް ސްޓެޓިސްޓިކްސް ބިއުރޯ (އެމް.އެސް.ބީ) އިން އާންމުކުރި 'ނޭޝަނަލް ޕޮޕިއުލޭޝަން ޕްރޮޖެކްޝަން' ރިޕޯޓުން އަންދާޒާކޮށްފި އެވެ.

2022 ވަނަ އަހަރުގެ ބޯހިމެނުމުގެ މައްޗަށް ބިނާކޮށް އެމް.އެސް.ބީ އިން ކުރި މި ދިރާސާއިން ދައްކާ ގޮތުގައި، 25 އަހަރާއި 29 އަހަރާ ދެމެދުގެ އުމުރުފުރާގެ ބިދޭސީ ފިރިހެނުންގެ އަދަދު، ދިވެހި ފިރިހެނުންނަށްވުރެ 17,000 އިން އިތުރެވެ. އެ ރިޕޯޓުން އަންދާޒާކުރާ ގޮތުގައި މި އަދަދު ދިގު މުއްދަތުގައި އިތުރުވެ، 2062 ވަނަ އަހަރާ ހަމައަށް އަންނައިރު އެ ފަރަގު ބޮޑުވެ، ދިވެހި ފިރިހެނުންނާ އަޅާބަލާއިރު ބިދޭސީންގެ އަދަދު 40,000 އަށް އިތުރުވާނެ އެވެ.

2062 ވަނަ އަހަރާ ހަމައަށް ރާއްޖޭގެ އާބާދީ 678,024 އަށް އަރާނެ ކަމަށް އަންދާޒާކުރެވެ އެވެ. އޭގެ ތެރޭގައި 414,679 ދިވެހިންނާއި 263,345 ބިދޭސީން ހިމެނޭނެ އެވެ.

ރިޕޯޓުގައި ބުނެފައިވާ ގޮތުގައި، މިކަމުގެ ސަބަބުން ރާއްޖޭގައި ދަރިމައިވުމުގެ ނިސްބަތް ދަށްވެ، އާބާދީ އިތުރުވަމުންދާ ވަރަކަށް، ބޭރުގެ މަސައްކަތްތެރިންނަށް ބަރޯސާވުން އިތުރުވެގެންދާނެ އެވެ. މި ޓްރެންޑަށް ބަލާއިރު، ދިގު މުއްދަތަކަށް ލޭބާ ޑިމާންޑް އިތުރުވަމުންދަނީ ގިނައިން ބިދޭސީން މަސައްކަތްކުރާ ކޮންސްޓްރަކްޝަން އަދި ފަތުރުވެރިކަމުގެ ދާއިރާއިންނެވެ.

މީގެ އިތުރުން ދިވެހިންގެ ތެރެއިން ވަޒީފާ އަދާކުރާ މީހުންގެ އަދަދު ދަށްވެ، އުމުރުން ދުވަސްވީ މީހުންގެ އާބާދީ އިތުރުވަމުންދާނެ ކަމަށް ރިޕޯޓުގައި ވެ އެވެ. މި ދިރާސާއިން ދައްކާ ގޮތުގައި، ދިވެހި އަންހެނުންގެ އެވްރެޖް އުމުރު 85.3 އަހަރަށް އަދި ފިރިހެނުންގެ އެވްރެޖް އުމުރު 82.8 އަހަރަށް އަރާނެއެވެ. މި ހުރިހާ ކަމަކީ ރާއްޖެއިން ބޭރުގެ މަސައްކަތްތެރިންނަށް ބަރޯސާވުން އިތުރުވާނެ ކަމެއް ކަމަށް އެމް.އެސް.ބީ އިން ފާހަގަކުރި އެވެ.

ޖުމްލަކޮށް ބަލާއިރު، ރާއްޖޭގެ ޑިމޮގްރަފިކް ލޭންޑްސްކޭޕް ބަދަލުވަމުންދާއިރު، ދިވެހި މަސަތްކަތްތެރިންގެ އަދަދު ދަށްވެ، އާބާދީ މުސްކުޅިވެ، 2062 ވަނަ އަހަރުގެ ނިޔަލަށް ގައުމުގެ އިގްތިސާދީ ބޭނުންތައް ފުއްދުމަށް ބިދޭސީ މަސަތްކަތްތެރިންނަށް ބަރޯސާވުން އިތުރުވާނެ ކަމަށް މި ރިޕޯޓުން ފާހަގަކުރެ އެވެ.