ދިރާސީ އަހަރު ނިމި ދަރިވަރުންގެ ބޮޑު ޗުއްޓީ މިއަދު ފެށިއްޖެ އެވެ.

ދަރިވަރުންނަށް މިއަދު ސްކޫލްތަކުން ވަނީ ރިޕޯޓް ފޯމު ހަވާލުކޮށްފަ އެވެ. މި އަހަރުގެ ދިރާސީ އަހަރުގެ ކިޔެވުން ފެށީ އޭޕްރީލް މަހުގެ 7 ގަ އެވެ.

ކުރިން އޮންނަ ގޮތަށް، ދަރިވަރުންނަށް ޑިސެމްބަރުގައި ބޮޑު ޗުއްޓީ މި ލިބުނީ ހަތަރު އަހަރަށް ފަހު އެވެ. މިދިޔަ ސަރުކާރުގައި ދިރާސީ އަހަރުގެ ކަލަންޑަރަށް ގެނައި ބަދަލާއެކު ބޮޑު ޗުއްޓީ ލައްވާލީ އަހަރުގެ މެދުތެރެއަށެވެ. ނަމަވެސް، ބެލެނިވެރިންގެ އެދުމާއި ދަރިވަރުންނަށް އެންމެ ރަނގަޅު ގޮތަކީ ބޮޑު ޗުއްޓީ އަހަރުގެ ފަހުކޮޅަށް ބަދަލުކުރުން ކަމަށް ވާތީ، މި ސަރުކާރުން ވަނީ އަންނަ އަހަރުން ފެށިގެން ދިރާސީ އަހަރު ފެށޭ ދުވަސްވަރު ބަދަލުކޮށްފަ އެވެ.

ބޮޑު ބަންދަށް ފަހު އަންނަ ދިރާސީ އަހަރު ފަށާނީ އަންނަ މަހުގެ 27 ގަ އެވެ. ފުރަތަމަ ޓާމުގެ މިޑް ބްރޭކް މޭ މަހުގެ 24 އިން 30 އަށް ލިބޭ އިރު، ފުރަތަމަ ޓާމުގެ ކިޔެވުން ނިންމައި ދަރިވަރުންނަށް ޗުއްޓީ ލިބޭނީ، ޖުލައި މަހުގެ 17 އިން އޮގަސްޓް 1 ހަމައަށެވެ.

މި ދިރާސީ އަހަރު ރާއްޖޭގެ ސްކޫލުތަކުގައި 84،000 އެއްހާ ދަރިވަރުން ތައުލީމު ހާސިލުކުރި އެވެ. އެ ކުދިންނަށް ކިޔަވައިދިނުމުގައި ދިވެހި 6،516 ޓީޗަރުންނާއި 1،843 ބިދޭސީ ޓީޗަރުން މަސައްކަތް ކުރެ އެވެ.