އެއްގަމު އުޅަނދު ރެޖިސްޓްރީކުރުމަށްޓަކައި ހުށަހަޅަންޖެހޭ ލިޔެކިއުންތަކުގެ ތެރެއިން ވެހިކަލް ގަރާޖް ޕާމިޓް އުނިކޮށް އުސޫލަށް ބަދަލު ގެނެސްފި އެވެ.
ގަރާޖާ ގުޅޭގޮތުން ބެލުމަށް ބޭނުންވާ ކަންކަން ކަށަވަރުކުރަން ގެންގުޅޭ އުސޫލަށް ޓްރާންސްޕޯޓް މިނިސްޓްރީން ވަނީ މިފަހުން ބަދަލު ގެސްފަ އެވެ. މި ބަދަލުތަކާ ގުޅިގެން އެ މިނިސްޓްރީން ނެރުނު ބަޔާނެއްގައި ބުނެފައިވަނީ، ހުށަހަޅަން ޖެހޭ ލިޔެކިއުންތަކުން ގަރާޖު ޕާމިޓް އުނިކުރި ނަމަވެސް، މިހާރުވެސް އުޅަނދު ބޭއްވުމަށް ރެޖިސްޓްރީކޮށްފައިވާ ގަރާޖު ޖާގައެއް އޮންނަން ޖެހޭނެ ކަމަށެވެ.
މި ނިންމުމަށް އަންނަ އަހަރުން ފެށިގެން އަމަލުކުރާނެ އެވެ.
ގަރާޖު ޕާމިޓް ހުށަހަޅަން ނުޖެހޭ ގޮތަށް ހެދުމުން، ދެން އެއްގަމު އުޅަނދު ރެޖިސްޓްރީކުރަން ހުށަހަޅަން ޖެހޭނީ:
- މާލެ ސިޓީ ކައުންސިލުން ނުވަތަ ހައުސިން ޑީވެލޮޕްމެންޓް ކޯޕަރޭޝަން (އެޗްޑީސީ) އިން ދޫކުރާ ވަކި ކަމަކަށް އިމާރާތް ބޭނުންކުރުމުގެ ހުއްދަ
- ގަރާޖުގެ ވެރިފަރާތުގެ އިއުތިރާޒެއް ނެތްކަމުގެ ލިއުމާއި އެމީހާގެ އައިޑެންޓިފިކޭޝަން
މި ބަދަލު ގެނެސްފައިވަނީ، މިނިސްޓްރީން ބުނިގޮތުގައި އިދާރީ ގޮތުން ގަރާޖުކުރުމާ ގުޅޭ ކަންކަން ކަށަވަރުކުރާނެ ގޮތްތައް ކަނޑައަޅައި ،ކުރިން ވަކި ދެ އިދާރާއަކުން ދެ ހުއްދަ ނަގަންޖެހި އެއް ހިދުމަތެއް ފުރިހަމަ ކުރުމަށް ދެ ފަހަރަށް ހުށަހަޅަން ޖެހުމުން ކުރިމަތިވާ ދަތިތައް ފަސޭހަކުރުމުގެ ގޮތުން ނެވެ.
މީގެއިތުރުން 2019 ވަނަ އަހަރު ގަރާޖް ލާޒިމް ކުރުމުގެ ކުރިން އަދި ކަނޑައެޅިގެން ވަކި ގަރާޖަކަށް ރެޖިސްޓްރީކޮށްފައިނުވާ އުޅަނދުތަކުގެ ވެރިފަރާތް ބަދަލު ނުކުރެވި ގިނަ ރައްޔިތުންތަކެއް އެކަމުގެ ޝަކުވާ ހުށަޅަމުންދާތީ އެ މައްސަލައަށް ވެސް ހައްލެއް ގެނެސްފައިވާ ކަމަށް މިނިސްޓްރީން ބުންޏެވެ. އެގޮތުން މިހާރުވެސް މާލެ ޒޯނުގައި ރެޖިސްޓްރީކޮށްފައިވާ އެފަދަ އުޅަނދުތަކަށް އިތުރު ގަރާޖު ލިޔުމެއް ހުށަހެޅުމަކާ ނުލައި ވެރިފަރާތް ބަދަލު ކުރެވޭނެ އިންތިޒާމް މިހާރު ހަމަޖައްސާފައިވާކަމަށް ބުނެފައިވެ އެވެ.
މި ބަދަލުތައް ގެނެވުނު ނަމަވެސް، ގަރާޖުގެ ވެރިފަރާތުގެ ކޮންސެންޓް ވެރިފައިކުރުމާއި ގަރާޖް އިންސްޕެކްޓްކުރުމުގެ މަސައްކަތް މިނިސްޓްރީން ކުރާނެ ކަމަށް ބުނެފައިވެ އެވެ.
