ޑްރަގް ކެފޭގެ ގޮތުގައި ހިންގި 11 ތަނެއް މިއަހަރު ބަންދުކޮށްފައިވާކަމަށް ދިވެހި ފުލުހުންގެ ހިދުމަތުން ބުނެފި އެވެ.
މަސްތުވާތަކެއްޗާ ދެކޮޅަށް ކުރަމުންދާ މަސައްކަތްތަކާ ގުޅޭގޮތުން ބޭއްވި ނޫސްވެރިންގެ ބައްދަލުވުމުގައި ފުލުހުންގެ ޑްރަގް އެންފޯސްމަންޓުގެ ކައުންޓަރު ނާކޮޓިކްސް އޮޕަރޭޝަންސް ހިންގެވުމާ ހަވާލުވެ ހުންނެވި ޗީފް އިންސްޕެކްޓަރު އޮފް ޕޮލިސް ފާތިހް މުހައްމަދު ވިދާޅުވީ މަސްތުވާތަކެތީގެ ވިޔަފާރިކުރާ ޖުމްލަ 50 ތަނެއް ފާހަގަކުރެވޭއިރު މާޅޭގައި އެފަދަ ވިޔަފާރިކުރާ އެކްޓިވް 30 ތަނެއް ފާހަގަކުރެވިފައިވާ ކަމަށެވެ. އަދި މިއަހަރު ބަންދު ކުރި 11 ތަނުގެ އިތުރަށް 20 ވަރަކަށް ތަން އަދިވެސް މާލޭގައި ހުރިކަމަށް ލަފާކުރެވޭ ކަމަށެވެ.
ފާތިހު ވިދާޅުވީ، ޖެނުވަރީ 1 އިން ފެށިގެން ޑިސެމްބަރު 20 ވަނަ ދުވަހުގެ ނިޔަލަށް މުޅި ރާއްޖޭގައި މަސްތުވާތަކެތީގެ 188 އޮޕަރޭޝަން ހިންގާފައިވާ ކަމަށެވެ. އެ އޮޕަރޭޝަންތަކުގައި ފާހަގަކުރެވުނު ބިދޭސީންގެ ތެރެއިން 137 މީހަކު ޑީޕޯޓްކުރުމަށް މޯލްޑިވްސް އިމިގްރޭޝަނާ ވަނީ ހަވާލުކޮށްފައެވެ. އަދި، މަސްތުވާތަކެތި ބޭނުންކުރާ މީހުން ފާހަގަކޮށް ޑްރަގު ކޯޓު މެދުވެރިކޮށް ފަރުވާ ފުރިހަމަކުރުމަށް 301 މީހަކު ނޭޝަނަލް ޑްރަގް އެޖެންސީ (އެންޑީއޭ) އާ ހަވާލުކޮށްފައިވާ ކަމަށް ފާތިހު ވިދާޅުވި އެވެ.
އޮޕަރޭޝަންތައް ފުޅާކޮށް 1624 މީހެއްގެ ބޮޑީޗެކް ވެސް ކޮށްފައިވެ އެވެ. އެއީ މަސްތުވާތަކެތީގެ މައްސަލަތަކުގައި ހިމެނޭ ޓްރެފިކިން މިންގަނޑަށް ފެތޭ މީހުންނާއި މަސްތުވާތަކެތީގެ މައްސަލަތަކުގައި ޝާމިލްވާކަމަށް ބެލެވޭ މީހުން ކަމަށް ފުލުހުން ބުނެފައިވެ އެވެ. ބޮޑީޗެކް ކުރުމުގެ ތެރެއިން 997 މީހަކު ފުލުހުންގެ ބެލުމުގެ ދަށަށް ގެންގޮސްފައިވާކަމަށް ފާތިހު ވިދާޅުވި އެވެ.
