އަންނަ ޖަނަވަރީ މަސް ނިމޭއިރު ޕޭޕަލްގެ އެކްސެސް ފުރިހަމައަށް ލިބޭނެ ކަމަށް ރައީސުލްޖުމްހޫރިއްޔާ ޑރ. މުހައްމަދު މުއިއްޒު ރޭ ވިދާޅުވެއްޖެ އެވެ.
"ނޭޝަނަލް ޔޫތު ކޮންފަރެންސް 2025″ ގައި ހިމެނިގެން ރޭ ބޭއްވި "ޔޫތު ކޮފީ ވިތު ޕްރެޒިޑެންޓް" ހަރަކާތުގައި ވާހަކަފުުޅު ދައްކަވަމުން ރައީސް ވިދާޅުވީ ކްރިއޭޓިވް އިންޑަސްޓްރީގައި އިންޓަނޭޝަނަލް އެކްސެސިބިލިޓީ ހޯދުމަކީ އެމަނިކުފާނުގެ މެނިފެސްޓޯގައި ވަރަށް ބޮޑު އިސްކަމެއް ދީފައިވާ ކަމެއް ކަމަށެވެ.
އެގޮތުން ޕޭޕަލް ގެނައުމަށް ކުރި މަސައްކަތް ފާހަގަ ކުރެއްވި އެވެ. ރައީސް ވިދާޅުވީ ރާއްޖެއަށް ޕޭޕަލްގެ ހިދުމަތް ތައާރަފުކުރަން އުރީދޫ އިން ދަނީ ތައްޔާރުވަމުންކަމަށެވެ. އަދި މޯލްޑިވްސް މަނިޓަރީ އޮތޯރިޓީ (އެމްއެމްއޭ) އިން ވަނީ އިންވާޑް ރެމިޓެންސް ލައިސަންސް ރަސްމީކޮށް އުރީދޫ ފިންޓެކްއަށް ދީފަ ކަމަށެވެ.
ރައީސް އިތުރަށް ވިދާޅުވީ، ބީއެމްއެލްގެ "ސްވައިޕް" މި މަހު ޓެސްޓިންއަށް ހުޅުވާލާނެ ކަމަށެވެ. އަދި މި ނޫންވެސް އިތުރު ފުރުސަތުތައް ވެސް ހުޅުވޭނެ ކަމަށް ވިދާޅުވި އެވެ.
