އިންޑިއާގެ ޔުނިފައިޑް ޕޭމަންޓް އިންޓަފޭސް (ޔޫޕީއައި)އާ، ފަވަރަ އަންނަ ޖުލައިގެކުރިން ގުޅައިލެވޭނެ ކަމަށް މަރުކަޒީ ބޭންކް (އެމްއެމްއޭ)ގެ ގަވަރުނަރު އަހުމަދު މުނައްވަރު މިއަދު ވިދާޅުވެއްޖެ އެވެ.
މުނައްވަރު މިފަދައިން ވިދާޅުވީ މާލީ ދާއިރާ ތަރައްގީކުރުމަށްޓަކައި ކުރިއަށްގެންދާ ހަރަކާތްތަކެއް އިފްތިތާހުކުރުމަށް ސަރުކާރުން މިއަދު ބޭއްވި ރަސްމިއްޔާތުގައި ވާހަކަދައްކަވަމުން ނެވެ. އެގޮތުން، ސަރުކާރުން ކުރިއަށްގެންދާ އެންމެ ބޮޑު އެއް މަސައްކަތަކީ އަންނަ އޭޕްރިލް މަހު ފަވަރައާއެކު، މިއަދު އިފްތިތާހުކުރެވުނު "ޕޭމެންޓް މޯލްޑިވްސް" އިން ކިއުއާރު ކޯޑުން ފައިސާގެ މުއާމަލާތްތައް ކުރެވޭ ގޮތް ހެދުން ކަމަށް އޭނާ ވިދާޅުވި އެވެ.
ޕޭމްންޓް މޯލްޑިވްސް އުފެއްދީ ފަވަރަ އާއި އޮޓޯމޭޓެޑް ކްލިއަރިން ހައުސް (އޭސީއެޗް) ފަދަ ރީޓެއިލް ޕޭމަންޓް ސިސްޓަމްތަކުގެ އޮޕަރޭޝަންސް ހިންގުމާއި، އެ ސިސްޓަމްތައް އިތުރަށް ކުރިއެރުވުމަށް ކުރަން ޖެހޭ ކަންކަން ކުރިޔަށް ގެންދިޔުމަށެވެ.
މި މަސައްކަތާއި ގުޅިގެން ކުރެވުނު މަޝްވަރާތަކުގެ އަލީގައި މުނައްވަރު ވިދާޅުވީ ޖުލައިގެ ކުރިން އިންޑިއާގެ ޔޫޕީއައިއާ ފަވަރަ ގުޅާލެވޭނެ ކަމަށެވެ.
އިންޑިއާގެ ޔުނިފައިޑް ޕޭމަންޓް އިންޓަފޭސް (ޔޫޕީއައި) ރާއްޖެއަށް ތައާރަފުކުރުމަކީ ރައީސުލްޖުމްހޫރިއްޔާ ޑރ. މުހައްމަދު މުއިއްޒުގެ މުހިއްމު ވައުދުފުޅެކެވެ. އެމަނިކުފާނު ވަނީ އެ ހިދުމަތް ރާއްޖެއަށް ތައާރަފްކުރުމުގެ މަސައްކަތް ފަށަން ނިންމިކަން މިއަހަރުގެ އޮކްޓޯބަރުގައި އިއުލާނުކުރައްވާފަ އެވެ.
މި ރަސްމިއްޔާތުގައި ވަނީ މާލީ ދާއިރާ ތަރައްގީކުރުމުގެ ހަރަކާތްތަކުގެ ތެރެއިން ތަފާތު 3 ކަމެއް ވަނީ އިފްތިތާހުކޮށްފަ އެވެ. އެއީ ނޭޝަނަލް ފައިނޭންޝަލް އިންކުލޫޝަން ސްޓްރެޖެޓީއާއި ނޭޝަނަލް ފައިނޭންސް ރޯޑްމެޕްގެ އިތުރުން ޕޭމެންޓް މޯލްޑިވްސް އެެވެ.
