ބިންވެރިޔާ ސްކީމުގެ ދަށުން ހުޅުމާލެ ފޭސް 3 އިން ދޫކުރާ 698 ގޯތިތަކުގެ ގުރުއަތުލުން ކުރިއަށްގެންގޮސްފި އެވެ.
ބިންވެރިޔާ ސްކީމުގެ ދަށުން މާލެ ސަރަޙައްދުން ބަންޑާރަ ގޯތި ދޫކުރުމުގެ އުސޫލުގެ ދަށުން ހުޅުމާލެެ ފޭސް 3އިން 698 ގޯތި ވަނީ ދޫކޮށްފަ އެވެ. އެގޮތުން ފޭސް 3އިން 7 ސައިޒެއްގެ ގޯތީގެ ގުރުއަތުލުން ވަނީ މިއަދު ހެންދުނު 9:00 އަކުން ކުރިއަށް ގެންގޮސްފަ އެވެ.
ކަލާފާނު ސްކޫލުގައި ކުރިޔަށް ދިޔަ މި ގުރުނެގުމުގައި، ގޯތިތަކުގެ ގުރުއަތު އަލުން ނެގީ ހުޅުމާލޭގެ މާސްޓާ ޕްލޭނަށް ގެނެވުނު ބަދަލާއި، ހުޅުމާލެ ފޭސް 3ގެ ލޭންޑް ޔޫސް ޕްލޭނަށް ގެނެވުނު ބަދަލާ އެއްގޮތަށެވެ. އަދި ބިންވެރިޔާ ސްކީމްގެ ދަށުން ކުރިން ހުޅުމާލެ ތިންވަނަ ފިޔަވަހިން ގޯތި ލިބިފައިވާ ފަރާތްތަކުގެ ގޯތީގެ ސަރަޙައްދަށް ބަދަލު އައިސްފައިވުމުން، އާ ލޮޓް ނަންބަރެއް ވެސް ވަނީ ކަނޑައަޅާފަވެ އެވެ.
ފޭސް 3އިން ދޫކުރާ ގޯތީގެ އަދަދާއި ބޮޑުމިން:
- 1650 އަކަފޫޓުގެ 181 ގޯތި
- 2050 އަކަފޫޓުގެ 242 ގޯތި
- 2450 އަކަފޫޓުގެ 132 ގޯތި
- 2850 އަކަފޫޓުގެ 62 ގޯތި
- 3250 އަކަފޫޓުގެ 41 ގޯތި
- 3650އަކަފޫޓުގެ 16 ގޯތި
- 4000 އަކަފޫޓުގެ 24 ގޯތި
ހައުސިން މިނިސްޓްރީއިން ބުނީ، ގުރުއަތު ނިމުމުން، ގޯތި ހަވާލުކުރުމުގެ އެއްބަސްވުމުގެ ސޮއިކުރުމާއި ގޯތީގެ ރަޖިސްޓަރީ ހަވާލުކުރުމުގެ މަސައްކަތް ކުރިއަށްގެންދާނެ ގޮތުގެ މައުލޫމާތު ފަހުން އާންމުކުރާނެކަމަށެވެ.
މިދިޔަ އަހަރު ފޭސް 3ގެ ލޭންޑް ޔޫސް ޕްލޭން ތައްޔާރުކުރެވިފައިވާ ގޮތުން، މިހާރު ބޭނުން ކުރަމުންދާ ބަނދަރުގައި މިވަގުތަށް ބޭނުންވާ އުޅަނދުފަހަރު ބަނދަރުކުރުމަށް އެކަށީގެންވާ ޖާގައެއް ނެތެވެ. އަދި ހުޅުމާލެ ދެ ފިޔަވައި ވަކިވާގޮތަށް ޕްލޭން ކުރެވިފައިވުމުން، ފެނާއި ނަރުދަމާ އަދި ކަރަންޓު ފަދަ އަސާސީ ހިދުމަތްތައް ފޯރުކޮށްދިނުމަށް ގިނަ ދަތިތަކެއް ދިމާވާނެތީ ފޭސް 3 އަބާދުކުރުމަށް ބޭނުންވާ ހިދުމަތްތައް ފޯރުކޮށްދިނުމަށް ގިނަ ގޮންޖެހުންތަކެއްވެސް ކުރިމަތިވާނެ އެވެ.
އެހެންކަމުން ހައުސިން ޑިވެލޮޕްމަންޓް ކޯޕަރޭޝަން (އެޗްޑީސ)ީއިން ފޭސް 3ގެ ލޭންޑް ޔޫސް ޕްލޭނަށް ބަދަލު ގެނެސް، ރައްޔިތުންގެ ހިޔާލާއި މަޝްވަރާގެ މަތީން ހުޅުމާލެ ފޭސް3 ހިމެނޭގޮތަށް މުޅި ހުޅުމާލޭގެ އާ މާސްޓަރ ޕްލޭނެއްވަނީ އެކުލަވާލާފަ އެވެ.
