ގަވާއިދާ ހިލާފަށް ރާއްޖޭގައި ވަޒީފާ އަދާ ކުރަމުން އަންނަ ބިދޭސީން ލީގަލައިޒް ކުރުމަށް ވަކި މުއްދަތެއް ހޯމްލޭންޑް ސެކިއުރިޓީ އެންޑް ޓެކްނޮލޮޖީން ދީފި އެވެ.
އެ މިނިސްޓްރީއިން ނެރުނު އިއުލާނެއްގައި ބުނީ، ރާއްޖޭގައި ވަޒީފާ އަދާކުރާ ބިދޭސީންގެ "މާސް ލީގަލައިޒޭޝަން ޕްރޮގްރާމް" 2026 ޖަނަވަރީ 01 ވަނަ ދުވަހުން ފެށިގެން 2026 އޭޕްރީލް 02 ވަނަ ދުވަހާ ހަމައަށް ހުޅުވާލާ ކަމަށެވެ.
މި ޕރޮގްރާމްގެ ތެރެއިން ހުއްދައެއް ނެތި، ނުވަތަ ހުއްދައެއް އޮތްނަމަވެސް ހުއްދައިގެ މުއްދަތު ހަމަވެފައިވާ ބިދޭސީން ނުވަތަ ކާކުކަން އަންގައިދޭ ސައްހަ ލިޔުމެއް ނެތި އުޅޭ ބިދޭސީންނަށް އަމާޒުކޮށް އޮޕަރޭޝަން ކުރަނގީގެ ދަށުން ލީގަލައިޒްވުމަށް ފުރުސަތު ދޭނެ އެވެ.
މި ޕްރޮގްރާމްގެ ދަށުން ލީގަލައިޒް ވެވޭނީ ބައެއް ޝަރުތުތައް ފުރިހަމަވާ ބިދޭސީންނަށެވެ. އެއީ:
- ވޯކް ޕާމިޓް މުއްދަތު ހަމަވެފައިވުން
- އެއްވެސް ސަބަބަކާ ހުރެ ބްލެކްލިސްޓްކޮށްފައިވާ ބިދޭސީއެއް ކަމުގައި ނުވުން
- ރާއްޖޭގައި މިވަގުތު ހުރި ބިދޭސީއެއް ކަމުގައިވުން
- ބިދޭސީ ފަރާތް ލީގަލައިޒް ކުރަން އެދޭ ވަޒީފާދޭ ފަރާތަކީ، އެންމެ ފަހުން ވޯކް ޕާމިޓް ދޫކޮށްފައިވާ ވަޒީފާ ދޭ ފަރާތަށް ނުވުން
- ވަޒީފާ އަދާ ކުރުމުގެ ހުއްދައެއްގެ ދަށުން ރާއްޖެ އެތެރެވެފައިވާ ބިދޭސީއަކު ކަމުގައިވުން
- އެއް ފަހަރު ލީގަލައިޒްވެފައިވާ ބިދޭސީއެއް ކަމުގައި ނުވުން
- މިމަހުގެ 31 ވަނަ ދުވަހުގެ ކުރިން ވަޒީފާ ދޭ ފަރާތުން ފިލާފައިވާކަމަށް ނުވަތަ ގެއްލިފައިވާ ކަމަށް އެކްސްޕެޓް ސިސްޓަމްގައި ރިޕޯޓްކޮށްފައިވާ ބިދޭސީއެއް ކަމުގައިވުން
ލީގަލައިޒްވުމަށް އެދި ހުށަހެޅުމުގެ ކަންތައް ކުރިއަށްގެންދާނީ ވަޒީފާ ދޭނެ ފަރާތެއް ހުރި ބިދޭސީންނަށް ވާތީ، އެކްސްޕެޓް ސިސްޓަމް މެދުވެރިކޮށް ވަޒީފާދޭ ފަރާތުންނެވެ. މިގޮތުން ހުށަހަޅާނެ ގޮތުގެ ޔޫޒާ ގައިޑް އެކްސްޕެޓް ސިސްޓަމްގެ ހޯމް ޕޭޖަށް އަޕްޑޭޓް ކުރާނެ ކަމަށް މިނިސްޓްރީން ވަނީ ހާމަކޮށްފަ އެވެ.
