ދިވެހިން އެދޭ އެދުމަކީ މި އަހަރުގެ ސެންޓްރަލް އޭޝިއާ ވޮލީ ބޯލް އެސޯސިއޭޝަން (ކާވާ) ކަޕް މުބާރާތުގެ ތަށި ކާމިޔާބުކުރުން ކަމަށް ރައީސުލްޖުމްހޫރިއްޔާގެ ނައިބު ޙުސައިން މުހައްމަދު ލަތީފް ވިދާޅުވެއްޖެ އެވެ.
އެ މަނިކުފާނު މިފަދައިން ވިދާޅުވީ މި މަހުގެ 20 އިން 25 އަށް ބޭއްވުމަށް ހަމަޖެހިފައިވާ "ކާވާ ކަޕް ފޯ ވިމެން 2025″ ގެ ޖާޒީ ދިވެހި ގައުމީ އަންހެން ވޮލީބޯޅަ ޓީމާއި ހަވާލުކޮށްދެއްވުމަށް މިއަދު މެންދުރުފަހު ޒުވާނުންގެ މަރުކަޒުގައި ބޭއްވި ރަސްމިއްޔާތު ޝަރަފުވެރިކޮށްދެއްވައި ދެއްކެވި ވާހަކަފުޅުގަ އެވެ.
ނައިބު ރައީސްގެ ވާހަކަފުޅުގައި، މިދިޔަ އަހަރު ކާވާ ކަޕްގައި ދިވެހި ޓީމުން ކުޅުނު ގިނަ އަދަދެއްގެ މެޗުތަކެއް ބައްލަވާލެއްވުމުގެ ނަސީބު ލިބިވަޑައިގެންނެވިކަމުގައި ވިދާޅުވި އެވެ. އަދި އެ މުބާރާތުގެ ފައިނަލް މެޗުގައި ދިވެހި ޓީމުން ދެއްކި ހިތްވަރުގަދަ މޮޅު ކުޅުން ބައްލަވައިލެއްވުމުގެ ފުރުސަތު ވެސް ލިބިވަޑައިގެންނެވިކަން އެމަނިކުފާނު ހާމަކުރެއްވި އެވެ.
މީގެއިތުރުން އެ މުބާރާތުގެ ފައިނަލް މެޗުގައި ދިވެހި ސަޕޯޓަރުންގެ ކުރިމަތީގައި އެ ކުޅުންތެރިން ދެއްކި އާދަޔާ ހިލާފު ހުނަރުވެރި ކުޅުމަކީ ދިވެހިންނަށް މިހާރު މިފަދަ މުބާރާތެއްގައި ތަށި ހައްގުވާ މިންވަރުގެ ކުޅުމެއްކަމުގައި ވިދާޅުވެ، މި އަހަރުގެ މި މުބާރާތުގައި ދިވެހިން އެދޭ އެދުމަކީ އެފަދަ މޮޅު ކުޅުމެއް ދައްކައި، ތަށި ގެނައުން ކަމުގައި އެ މަނިކުފާނުގެ ވާހަކަފުޅުގައި ފާހަގަކުރެއްވި އެވެ.
ނައިބު ރައީސް އިތުރަށް ވިދާޅުވީ، ދިވެހި ސަރުކާރުން ވޮލީބޯޅަ ކުރިއެރުވުމަށްޓަކައި ކުރަންޖެހޭ ހުރިހާ މަސައްކަތެއް، ރައީސުލްޖުމްހޫރިއްޔާ ކުރައްވަމުންގެންދަވާ ކަމަށާއި މިކަމުގައި ދެއްވަންޖެހޭ ހުރިހާ އެއްބާރުލުމެއް އެސޯސިއޭޝަނަށް ދެއްވަމުން ގެންދަވާކަމަށެވެ. އަދި ރާއްޖޭގައި މި ކުޅިވަރު ތަރައްޤީކޮށް، ކުރިއެރުވުމަށްޓަކައި އަދި އިތުރު ޒުވާން ކުޅުންތެރިން މިކުޅިވަރުގެ ތެރެއަށް ޝައުގުވެރިކޮށް، ހުނަރުވެރި ކުޅުންތެރިން ހޯދުމަށްޓަކައި ރާއްޖޭގެ އެކި ކަންކޮޅުތަކުގައި ދުވަހަކުވެސް ވޮލީކޯޓުތައް ނޭޅޭ ފެންވަރަށް ކޯޓުތައް އެޅުމާއި އަދި ކުޅުންތެރިން އުފެއްދުމަށްޓަކައި ދޭންޖެހޭ ސަޕޯޓު އެކިއެކި ޖަމިއްޔާތައް މެދުވެރިކޮށް ކުޅިވަރާ ބެހޭ ވުޒާރާއިން ދެއްވަމުންގެންދަވާކަންވެސް އެމަނިކުފާނުގެ ވާހަކަފުޅުގައި ފާހަގަކުރެއްވި އެވެ.
