އެތައް ވަޒީފާއަކަށް ބިދޭސީން ގެނައުން މަނާކުރެވޭ ގޮތަށް، ރާއްޖޭގައި ބިދޭސީން ވަޒީފާ އަދާކުރުމާ ބެހޭ ގަވާއިދަށް ބަދަލު ގެނެސްފި އެވެ.

ރާއްޖޭގައި ބިދޭސީން ވަޒީފާ އަދާކުރުމާ ބެހޭ ގަވައިދު އިސްލާހުކޮށް ހޯމްލޭންޑް ސެކިއުރިޓީ މިނިސްޓްރީން މިދިޔަ އާދީއްތަ ދުވަހު ގެޒެޓުގައި އާންމުކުރި އިސްލާހުގައިވާ ގޮތުން، ބިދޭސީންނަށް ވަޒީފާ ނުދެވޭނެ ދާއިރާތައް ކަމަށް ވަޒީރުންގެ މަޖިލީހުން ކަނޑައެޅި ދާއިރާތައް ހިމަނާފައިވެ އެވެ.

ގަވާއިދަށް ގެނެސްފައިވާ އިސްލާހުގެ ދަށުން، އެއަށް އަމަލުކުރަން ފަށާތާ ދެ އަހަރު ދުވަހުގެ މުއްދަތަކަށް ފަހު ކޯޓާތައް ބާތިލްކޮށް އަދި އަލުން ކޯޓާ ނުދެވޭނެ ވަޒީފާތައް؛ ހެއާ ޑްރެސަރުން، ބިއުޓީޝަނުން، ބޭބީ ސިޓާސް، އިލެކްޓްރީޝަނުން، ޕާސަނަލް ޓްރެއިނާސް، ޓުއާ ގައިޑުން ގެސްޓް ރިލޭޝަން އޮފިސަރުން (އިންގްލިޝް)، އެކައުންޓެންޓުންގެ އިތުރުން އިމާމުންނެވެ.

އަލަށް ގެނައި އިސްލާހަށް އަމަލުކުރަން ފަށާތާ 3 އަހަރު ދުވަހުގެ މުއްދަތަކަށް ފަހު ކޯޓާތައް ބާތިލްކުރަންޖެހޭ ވަޒީފާތަކަކީ، ޑައިވަރުން، ނަރުހުން، ބިލްޑިން އިކްސްޕެކްޓަރުން، ސާވޭޔަރުން، ސައިޓް ސުޕަވައިޒަރުންގެ އިތުރުން ޕައިލެޓުންނެވެ.

ހަމައެއާއެކު ގަވާއިދަށް އިސްލާހަށް އަމަލުކުރަން ފަށާތާ 4 އަހަރު ދުވަހުގެ މުއްދަތަކަށް ފަހު ކޯޓާތައް ބާތިލްކުރާނެ ވަޒީފާތަކަކީ އިލެކްޓްރިކަލް އިންޖީނިއަރުންގެ އިތުރުން ޑައިވް އިންސްޓްރަކްޓަރުންނެވެ.