ކަސްޓަމްސްއިން ހިފެހެއްޓި ދެ ކޮންޓެއިނަރުގައި ހުރި ސިނގިރޭޓުތައް ވަގަށް ނެގި މައްސަލައާ ގުޅިގެން ހައްޔަރުކުރި ލޮޓަސް ފިހާރައިގެ ވެރިޔާ އަހުމަދު އާރިފް (އާއްޓޭ) އާއި އެޕޯލޯ ހޯލްޑިންގްސްގެ ވެރިޔާ މުހައްމަދު ވަހީދު (ދިގަލި) ބަންދުން ދޫކޮށްލައިފި އެވެ.
މި ކޮންޓެއިނަރުތަކުގައި ހުރި ސިނގިރޭޓުތަކަކީ އޭޕްރީލް މަހު ވަގަށް އެތެރެކުރަނިކޮށް ކަސްޓަމްސްއިން ހިފެހެއްޓި ތަކެއްޗެވެ. މި ވަގުދާން ހުޅުމާލެ އިންޓަނޭޝަނަލް ޓަރމިނަލުން ކުރިކަން އެނގުނީ އޮކްޓޯބަރު މަހުގެ ތެރޭގަ އެވެ. މި މައްސަލާގައި އާއްޓޭއާއި ދިގަލިގެ އިތުރުން ޖުމްލަ 8 މީހަކު ހައްޔަރުކޮށްފައިވެ އެވެ. ޕީޖީ އޮފީހުން މި މަހުގެ 3 ވަނަ ދުވަހު 11 މީހެއްގެ މައްޗަށް ދައުވާކުރުމަށް ފުލުހުން ހުށަހަޅާފައިވާކަމަށް ބުނެފައިވާއިރު، ގާނޫނީ މުއްދަތުގެ ތެރޭގައި ކޯޓަށް ދައުވާ ހުށަހަޅާނެކަމަށް ވެސް ޕީޖީން ވަނީ ހާމަކޮށްފަ އެވެ.
ޕީޖީން ބަންދު މުރާޖާކުރުމަށްފަހު އާއްޓޭއާއި ދިގަލި ދޫކޮށްލާފައިވަނީ، އެމީހުންގެ މައްޗަށް ތުހުމަތުކުރެވެނީ ކުށްކުރުމަށް ރޭވުން ކަމަށްވާއިރު، ވައްކަން ކުރުމުގައި އަމަލީގޮތުން ބައިވެރިވެފައިވާކަމުގެ ހެކި ލިބިފައިނުވާތީ އެވެ. އަދި މި މައްސަލާގައި ހައްޔަރުކުރި ކ. ތުލުސްދޫ، ލިންކް، ހަސަން އަބްދުއްރަހުމާން ވެސް ވަނީ ޝަރުތުކުރެވިގެން ބަންދުން ދޫކޮށްލާފަ އެވެ.
އެހެންކަމުން، މި މައްސަލާގައި މިހާރު ބަންދުގައި ތިބީ:
- ހދ. ވައިކަރަދޫ، މެދުރީގެ، ޒިވާރު އިސްމާއީލް
- ހދ. ވައިކަރަދޫ، ނޫރަލީގެ، އަހުމަދު ޝަހީމް
- ހ. ރުމޭނިޔާ، އަހްމަދު ފިރުސާން
- ސ. ހިތަދޫ، ޗާނދަނީގެ، ހުސައިން ސާމިހު
- ނ. މިލަދޫ، ކެނެރީގެ، އާދަމް ވަހީދު
- ބަނގުލަދޭޝް، މުހައްމަދު އަލަމިން މިއާ
- ހ. ނިއުހެޕިނަސް، މުއާޒު އަލީ
ޕީޖީން ވަނީ، އެ މީހުންގެ ބަންދު މުރާޖައާކުރުމަށްފަހު، މިވަގުތު ބަންދަށް ބަދަލެއް ގެންނަންޖެހޭ ހާާލަތެއް ނެތްކަމަށް ނިންމާފައެވެ. ސަބަބަކީ، އެމީހުންނަކީ މި ވައްކަން ކުރުމުގައި އަމަލީގޮތުން ބައިވެރިވިކަމަށް ތުހުމަތުކުރެވޭ މީހުން ކަމަށްވުމާއި، އެމީހުންގެ ރަސްމީ ހައިސިއްޔަތު ނަހަމަ ގޮތުގައި ބޭނުންކުރިކަމަށް ތުހުމަތުކުރެވޭ މީހުން ކަމުގައިވާތީ އެވެ.
ސައޫދީ އަރަބިއްޔާގެ ބިންލާދިން ގުރޫޕުގެ ނަމުގައި ރާއްޖެ އަށް ވަގަށް އެތެރެ ކުރަން އުޅެނިކޮށް ހިފަހައްޓާފައި ވަނީ 1،360 ކޭސް ސިނގިރޭޓެވެ. 40 ފޫޓުގެ ދެ ކޮންޓެއިނަރުގައި ހުރީ އެއީ ޖުމްލަ 13.6 މިލިއަން ސިނގިރޭޓް ސްޓިކެވެ. އެއީ 13.6 މިލިއަން ސިނގިރޭޓެވެ. މި ސިނގިރޭޓަށް 122 މިލިއަން ރުފިޔާގެ ޑިއުޓީ ދައްކަން ޖެހޭނެ ކަމަށް ކަސްޓަމްސް އިން ހާމަކޮށްފައިވެ އެވެ.
