ރާއްޖޭގެ ގައުމީ ވެކްސިން ޝެޑިއުލްގައި ނިއުމޮކޮކަލް އަދި ރޯޓާވައިރަސް ވެކްސިން ހިމަނައި، އެ ދެ ވެކްސިން ރަސްމީކޮށް ތައާރަފްކުރުމުގެ މަސައްކަތް ހެލްތް މިނިސްޓަރު  އިފްތިތާހްކޮށްދެއްވައިފި އެވެ.

މި ދެ ވެކްސިން ދިނުމަށް ހަމަޖެހިފައިވަނީ ޑިސެމްބަރު މަހުގެ 10 ވަނަ ދުވަހުން ފެށިގެން، އުމުރުން 2، 4، އަދި 6 މަހުގެ ތުއްތު ކުދިންނަށެވެ. މި ވެކްސިންތަކަކީ ތުއްތު ކުދިންނަށް އެންމެ އާންމުކޮށް ޖެހޭ ނުރައްކާތެރި ދެ ބަލި ކަމަށްވާ ނިއުމޯނިއާ އާއި ބޭރަށް ހިނގުމުން (ޑައިރިއާ) ރައްކާތެރިވުމަށް ވަރަށް މުހިއްމު ދައުރެއް އަދާކުރާ ވެކްސިންތަކެކެވެ.

ސިއްހީ ދާއިރާގެ އިސްވެރިން ފާޅުކުރައްވާ ގޮތުގައި، ޤައުމީ ވެކްސިން ޝެޑިއުލް އަޕްޑޭޓްކުރުމަކީ ކުދިންނަށް ދުޅަހެޔޮ ސިއްޙަތެއްގައި ދިރިއުޅުމަށް އެޅޭ އެންމެ މުހިއްމު އެއް ފިޔަވަޅެވެ. މިނިސްޓްރީ އޮފް ހެލްތުން ބެލެނިވެރިންނަށް އިލްތިމާސް ކުރައްވަނީ، މި ޝެޑިއުލްއާ އެއްގޮތަށް އަމަލުކުރުމަށާއި، މި ވެކްސިންތަކާ ބެހޭގޮތުން އިތުރު މައުލޫމާތު ހޯދުމަށް ސިއްހީ ހިދުމަތްދޭ ފަރާތްތަކާ މަޝްވަރާކުރުމަށެވެ.