މާލެ ސަރަހައްދުގެ ބޯހިޔާވަހިކަމުގެ މައްސަލަ ހައްލުކުރުމަށްޓަކައި ހިންގާ ރަސްމާލެ މަޝްރޫއުގެ ދަށުން 215 ހެކްޓަރުގެ ބިން ހިއްކާފައިވާ ކަމަށް ހައުސިން ޑިވެލޮޕްމެންޓް ކޯޕަރޭޝަން (އެޗްޑީސީ) އިން ބުނެފި އެވެ.

ދުނިޔޭގެ އެންމެ ބޮޑު އެއް ހޮޕާ ޑްރޭޖަރު ބޭނުންކޮށްގެން ރަސްމާލެ ހިއްކުމުގެ މަޝްރޫއު ފެށީ މި މަހު  އެވެ. އެ މަޝްރޫއުގެ ދަށުން ޖުމްލަ 1009 ހެކްޓަރުގެ ބިން ހިއްކާނެ އެވެ.

ސްރީލަންކާގެ ކެޕިޓަލް މެރިންއެންޑް ސިވިލް ކޮންސްޓްރަކްޝަނާއި ހަވާލުކޮށްފައިވާ 29 ހެކްޓަރުގެ މަސައްކަތް ނިމިފައިވާއިރު މޯހަން މުތާއާއި ހަވާލުކޮށްފައިވާ 394 ހެކްޓަރުގެ ތެރެއިން 100 ހެކްޓަރާއި ޗައިނާ ހާބަރ އިނޖިނިއަރިންގއާއި ހަވާލުކޮށްފައިވާ 265 ހެކްޓަރުގެ ތެރެއިން 53.25 ހެކްޓަރުގެ ބިން ވަނީ މިހާތަނަށް ހިއްކާފަ އެވެ.

ގެދޮރުވެރިކަމުގެ އިތުރުން އެ ސަރަހައްދު ބޭނުންކުރާނީ، ސިނާއީ ބޭނުންތަކަށާއި މެރީނާގެ ބޭނުމަށެވެ. އެ ސަރަހައްދު ހިއްކާ ނިންމުމުގެ ކުރިން އެ ތަނުން 15،000 ގޯތި ލިބޭ މީހުން ކަނޑައަޅުއްވާނެ ކަމަށް ރައީސުލްޖުމްހޫރިއްޔާ ޑރ. މުހައްމަދު މުއިއްޒު ވަނީ މީގެކުރިން ވިދާޅުވެފަ އެވެ.