ރައްޔިތުންގެ މަޖިލީހުގެ މި ފެށޭ ދައުރުގައި, ހާއްސަ ހާލަތްތަކުގައި ޕެންޝަން ފަންޑުން ފައިސާ ބޭނުންކުރެވޭގޮތަށް ގާނޫނަށް އިސްލާހު ހުށަހަޅުއްވާނެ ކަމަށް ރައީސުލްޖުމްހޫރިއްޔާ ޑރ. މުހައްމަދު މުއިއްޒު ރޭ ވިދާޅުވެއްޖެ އެވެ.
ރައީސް މިފަދައިން ވިދާޅުވީ، މާލޭ ސިޓީގެ، ހެންވޭރު ރައްޔިތުންނާއެކު ބޭއްވި މަޝްވަރާ ބައްދަލު ކުރެއްވުމުގައި ވާހަކަފުޅު ދައްކަވަމުންނެވެ. ރޭގެ ބައްދަލްވުމުގައި ބައިވެރިވެވަޑައިގެންނެވި ބައެއް އާންމު ރައްޔިތުން ވަނީ މިހާރު ޕެންޝަން ފަންޑުން ފައިސާ ބޭނުން ކުރެވޭނެ ގޮތްތަކާއިމެދު އޮތް ކަންބޮޑުވުންތައް ރައީސްއާއި ހިއްސާ ކުރައްވާފަ އެވެ. އެ ވާހަކަތައް އަޑުއެއްސެވުމަށް ފަހު އެމަނިކުފާނު ވަނީ އެކަންބޮޑުވުންތަކަށް ހައްލު ހޯއްދަވައި ދެއްވާނެ ކަމުގެ ޔަގީންކަން ދެއްވަވާފަ އެވެ.
ރައީސް ވިދާޅުވީ، ހާއްސަ ހާލަތްތަކުގައި ޕެންޝަން ފަންޑުން ފައިސާ ބޭނުންކުރެވޭނެ ގޮތަށް ގާނޫނަށް އިސްލާހުތަކެއް ހުށަހަޅާނެ ކަމަށެވެ. އޭރުން މިހާރަށް ވުރެ ގިނަ ކަންކަމުގައި ޕެންޝަން ފަންޑުން ފައިސާ ބޭނުންކުރުމަށް ފުރުސަތު ލިބިގެން ދާނެކަމަށެވެ. އެހެންކަމުން، ވަރަށް މުހިއްމު ކަންތައްތަކުގައި ޕެންޝަން ފަންޑު ބޭނުންކުރުމަށް ފަހިވެގެންދާނެ ކަމަށް އެމަނިކުފާނު ފާހަގަ ކުރެއްވިއެވެ. ނަމަވެސް ގެންނާނެ ބަދަލުތަކާ ގުޅޭ ތަފުސީލެއް އެ މަނިކުފާނު ހިއްސާކުރައްވާފައެއް ނުވެ އެވެ.
ގާނޫނުގައި އޮތް ގޮތުން ޕެންޝަން ފައިސާ ލިބެންފަށާނީ 65 އަހަރުވުމުންނެވެ. އެހެންނަމަވެސް ބޮޑެތި ކަންކަން މެދުވެރި ވެގެން، ނުވަތަ ޒަރޫރީ ހާލަތްތައް މެދުވެރި ވެގެން ޕެންޝަން ފަންޑުން ފައިސާ ނެގޭނެ ގޮތެއް ހެދުމަށް ބައެއް މީހުން އެދެ އެވެ. މިހާރު ހައްޖަށް ދިއުމަށާއި ފްލެޓް ގަތުމަށް ވަކި އުސޫލެއްގެ ދަށުން ޕެންޝަން ފައިސާ ބޭނުންކުރެވެ އެވެ.
