ހުޅުމާލެ 2 ގައި ހުންނަ ހިޔާ ފްލެޓުތަކުގެ އެއްބަސްވުމުގެ އިސްލާހު އަދި ފްލެޓްތަކުގެ އަގަށް ގެނެސްފައިވާ ބަދަލު އެޗްޑީސީގެ "މައި ހުޅުމާލެ ޕޯޓަލް" އިން ފެންނާނެ ގޮތް މިއަދު ހަދައިފި އެވެ.
އެޗްޑީސީން ބުނީ ހިޔާގެ ކުއްޔަށް ސަރުކާރުން ދިން ލުއިތަކާ ގުޅިގެން ފުރިހަމަ ކުރަންޖެހޭ ލިޔެކިޔުންތައް ފުރިހަމަ ކުރުމަށް، ހިޔާ ފުލެޓުތަކުގެ އެއްބަސްވުމުގެ އިސްލާހު އަދި ފުލެޓުތަކުގެ އަގަށް އައިސްފައިވާ ބަދަލުތައް "މައި ހުޅުމާލެ ޕޯޓަލް" އިން މިހާރު ފެންނަން ހުންނާނެ ކަމަށެވެ. މިއީ ހިޔާ ފުލެޓު ލިބިފައިވާ ފަރާތްތަކަށް ސަރުކާރުން ދިން ލުއިތައް ރަސްމީކުރުމަށް ކުރެވުނު މުހިންމު މަސައްކަތެއްކަމަށް އެޗްޑީސީން ފާހަގަކުރި އެވެ.
ރައީސުލްޖުމްހޫރިއްޔާ ޑރ. މުހައްމަދު މުއިއްޒު ވަނީ ހިޔާ ފްލެޓްތައް މަރާމާތު ކުރުމަށް ރައްޔިތުންގެ އަތުން ދިޔަ ހަރަދަށްވާ ދެލައްކަ ރުފިޔާ 7 އަހަރަށް ބަހާލައިގެން ކުލިން ކުޑަ ކުރާ ގޮތަށް ނިންމަވާފަ އެވެ. އެގޮތުން އެމަނިކުފާނު ވަނީ ހިޔާ ފްލެޓްތަކުން މަހުން މަހަށް ދައްކާ ކުލި 3984 ރުފިޔާއަށް ކުޑަކުރައްވާފަ އެވެ. މެއިންޓަނަންސް ފީގެ ގޮތުގައި ކުރިއެކޭ އެއްގޮތަށް ދައްކާ 1000 ރުފިޔާ ދައްކަން ޖެހޭނެ އެވެ. ހިޔާގެ ކުލީގެ ގޮތުގައި ކުރިން ނަގަމުން އައިސްފައިވަނީ މެއިންޓަނަސް ފީ ހިމެނޭހެން 8500 ރުފިޔާ އެވެ.
ހިޔާ ފުލެޓުތަކުގެ އެއްބަސްވުމަށް ގެނެވުނު އިސްލާހުތަކާއި އަގަށް އައި ބަދަލުތަކުގެ ސަބަބުން، ފުލެޓު ލިބިފައިވާ ގިނަ ފަރާތްތަކަށް މާލީ ގޮތުން ލުއިތަކެއް ލިބިގެންދާނޭކަމަށްވެސް އެޗްޑީސީން ބުންޏެވެ.
ސަރުކާރުން ވަނީ 2023 ވަނަ އަހަރުގެ ޑިސެމްބަރުމަހު، 7 އަހަރަށް ހިޔާގެ ކުލި 3900 ރުފިޔާއަށް ކުޑަކޮށްފައެވެ. މެއިންޓަނަންސް ފީއާއެކު ހިޔާގެ އެޕާޓްމަންޓް ތަކަށް މިހާރު ދައްކަންޖެހެނީ މަހަކު 4900 ރުފިޔާ އެވެ.
