ރާއްޖެއަށް ކާބޯތަކެތި އެތެރެކުރުމަށް ބޭނުންވާ ހެލްތް ސެޓްފިކެޓާ ނުލައި، ކާބޯތަކެތީގެ ޝިޕްމަންޓްތަކެއް އެތެރެކުރުމަށް ހުއްދަ ދިން ކަމަށް ތުހުމަތުކުރެވޭ މޯލްޑިވްސް ފުޑް އެންޑް ޑްރަގް އޮތޯރިޓީ (އެމްއެފްޑީއޭ) ގެ ދެ މުވައްޒަފެއްގެ މައްޗަށް، ދައުވާކުރަން މިއަދު ކްރިމިނަލް ކޯޓަށް ހުށަހަޅައިފި އެވެ.
ޕްރޮސިކިއުޓާ ޖެނެރަލްގެ އޮފީހުން ބުނީ މި ދައުވާތައް ހުށަހެޅީ ރާއްޖޭގެ ކާބޯތަކެތީގެ ސަލާމަތާއި ރައްކާތެރިކަމަށް ސީދާ އަސަރުކުރާ ކުށެއް ކަމަށް ބަލައި، އާންމު މަސްލަހަތު ބޮޑު ކަމަށް ވުމުން ކަމަށެވެ.
މި މައްސަލައާ ގުޅިގެން ދައުވާކުރީ ޕޯޓް ކްލިއަރަންސްގައި މަސައްކަތްކުރާ އެމްއެފްޑީއޭގެ ފީލްޑް އޮފިސަރުން ކަމަށްވާ ދަފްތަރު ރސ 9244، އަހުމަދު ހާޝިމްގެ މައްޗަށާއި، ގދ. ތިނަދޫ، އަރަފާތު، އަހްމަދު ޒާހިރުގެ މައްޗަށެވެ. އެމީހުންނަށް ތުހުމަތުކުރަނީ 2025 ވަނަ އަހަރުގެ މާރިޗު މަހުގެ ތެރޭގައި ކަނޑުމަގުންނާއި، ވައިގެ މަގުން ދިވެހިރާއްޖެއަށް އެތެރެކޮށްފައިވާ ބައެއް ޝިޕްމަންޓްތައް، އެތަކެތި އެތެރެކުރުމަށް ބޭނުންވާ ހެލްތް ސެޓްފިކެޓް ނެތިވެސް ކްލިއަރެންސް ދިން ކަމަށެވެ.
މި ދެ މުވައްޒަފުންގެ މައްޗަށް ކޮށްފައިވަނީ ރަސްމީ ވާޖިބު އަދާކުރުމުގައި އެކަށީގެންނުވާ އަމަލެއް ހިންގުމުގެ ކުށުގެ ތިން ދައުވާ އެވެ. ޕީޖީން ވަނީ ކޮންމެ ދައުވާއަކަށް 4 މަހާއި 24 ދުވަހުގެ އަދަބެއް ކަނޑައެޅުމަށް ވަނީ ކްރިމިނަލް ކޯޓަށް ހުށަހަޅާފަ އެވެ.
ދައުވާލިބޭ މީހުންގެ ފަރާތުން ޕީޖީ އޮފީހާއެކު ނަސޭހަތުގެ އެއްބަސްވުމެއް ވުމަށް އެދި ހުށަހަޅާފައިވިނަމަވެސް، މި ކުށަކީ ރާއްޖޭގެ ކާބޯތަކެތީގެ ސަލާމަތާއި ރައްކާތެރިކަމާ ސީދާ ގުޅުންހުރި ކުށަކަށްވެފައި، ކާބޯތަކެތީގެ ސަލާމަތާއި ރައްކާތެރިކަން ކަށަވަރުކުރުމަށް ހެދިފައިވާ ގާނޫނުތަކާ އުސޫލުތަކާ ހިލާފަށް އަމަލުކޮށްފައިވާތީ، އާންމު މަސްލަހަތު ވަޒަން ކުރުމަށްފަހު ނަސޭހަތުގެ އެއްބަސްވުމެއް ނުހެދުމަށް ޕީޖީ އޮފީހުން ވަނީ ނިންމާފަ އެވެ. މި މައްސަލަ މިހާރު ކުރިއަށްދާނީ ކްރިމިނަލް ކޯޓުގައެވެ.
